हिंमत असेल तर त्या ऑडिओ क्लीप्स वाजवाच ! आमदार चंद्रकांत पाटलांचे खडसेंना आव्हान

मुक्ताईनगर : एकनाथराव खडसे यांचे मानसिक संतुलन बिघडले असून त्यामुळे ते बेछूट आरोप करत सुटले आहेत. त्रयस्थ इसमांच्या संवादाशी माझा काहीही संबंध नाही यामुळे खडसेंमध्ये जर हिंमत असेल तर त्यांनी त्या ऑडिओ क्लीप्स (Audio Clip) नक्की वाजवाव्यात, यात काही आढळून आले तर मी आमदारकीचा राजीनामा देईल. जर काही निघाले नाही तर खडसे राजकारण सोडतील का ?’ असा सवाल आमदार चंद्रकांत पाटील यांनी उपस्थित केला आहे. शनिवारी सायंकाळी एकनाथराव खडसे यांनी आरोप केल्यानंतर माध्यमांशी बोलतांना आमदारांनी एकनाथराव खडसे (Eknathrav Khadse) आणि त्यांच्या कन्येवर पुन्हा टीकास्त्र सोडले.

अवैध धंद्यांबाबत आपल्यावरील आरोप हास्यास्पद
मुक्ताईनगर तालुक्यात आपल्या कार्यकर्त्यांचे अवैध धंदे आहेत हा खडसे यांनी केलेला आरोप पूर्णपणे हास्यास्पद असून 99% अवैध धंदे यांच्या कार्यकर्त्याचे आहेत, असे आमदार चंद्रकांत पाटील (Mla Chandrakant Patil) म्हणाले. मुक्ताईनगरात महिला असुरक्षित आहेत असे खडसे म्हणत असले तरी याच खडसे यांनी एका पहिली विरोधात अशी टिप्पणी जाहीर कार्यक्रमातून केल्यानंतर मुंबईत यांच्याविरुद्ध 509 अन्वये गुन्हा दाखल झाला आहे, हे खडसे विसरले आहेत का ? असा प्रश्न आमदारांनी उपस्थित केला.