उपमुख्यमंत्री अजित पवार यांचा पीए बोलत असल्याचे सांगून मागितली खंडणी ; सहा आरोपी पोलिसांच्या जाळ्यात

उपमुख्यमंत्री यांच्या मोबाईल क्रमांकाचा वापर
किरण काकडे हा मुख्य सुत्रधार असून त्याने गुगल प्ले स्टोअरमधून फेक कॉल अ‍ॅप नावाचे अ‍ॅप डाऊनलोड करुन उपमुख्यमंत्री अजित पवार यांच्या मोबाईल क्रमांकाचा वापर केला. त्यावरुन त्याने दहा दिवसांपूर्वी अतुल गोयल यांना फोन केला. गोयल यांना तो अजित पवार यांच्याकडून फोन आला, असे वाटले. फोनवरुन त्याने आपण पी ₹.ए.चौबे बोलतोय असे भासविले. हवेली तालुक्यातील वाढे बोल्हाई येथील शिरसवडी येथील जमिनी संदर्भातील वाद मिटवून टाका, असे खोटे सांगून वाद मिटविला नाही तर तुम्हाला गावात पाऊल ठेवू देणार नाही, तुमचा कोणताही प्रकल्प होऊ देणार नाही, अशी धमकी दिली. त्यानंतर त्यांच्याकडे २० लाख रुपयांची खंडणी मागण्यात आली. त्यामुळे गोयल यांना शंका आली. त्यांनी गुन्हे शाखेकडे याबाबत तक्रार केली.

पोलिसांनी रचला सापळा
पोलीस आयुक्त अमिताभ गुप्ता, सह पोलीस आयुक्त डॉ. रवींद्र शिसवे, अपर पोलीस आयुक्त रामनाथ पोकळे, पोलिस उपायुक्त श्रीनिवास घाडगे, सहायक पोलीस आयुक्त गजानन टोम्पे यांच्या मार्गदर्शनाखाली कारवाईचा आराखडा तयार करण्यात आला. पोलिसांच्या सांगण्यानुसार गोयल यांनी खंडणीची रक्कम घेण्यासाठी बंडगार्डन रोडवरील सन मावू कॉम्प्लेक्समधील कार्यालयात बोलावले. पोलिसांनी तेथे सापळा रचला होता. त्यानुसार गुरुवारी दुपारी चार वाजण्याच्या सुमारास तिघे जण २ लाख रुपये घेण्यासाठी कार्यालयात आले होते. तिघे जण खालीच थांबले होते. पैसे घेतल्याबरोबर पोलिसांनी झडप घालून तिघांना पकडले. त्याचवेळी संपूर्ण परिसरात साध्या वेशातील पोलीस नजर ठेवून होते. कार्यालयात खंडणीखोरांना पकडल्याचे समजल्याबरोबर खाली थांबलेल्या तिघांना पोलिसांनी तातडीने ताब्यात घेतले.