भुसावळात मुसळधार पाऊस : झेडआरटीआय बोगदा वाहतुकीसाठी बंद

भुसावळ : शहराला सोमवारी सायंकाळी मुसळधार पाऊस झाल्याने झेडआरटीआय भागातील रेल्वे बोगदा पाण्याने तुंबल्याने रात्रीपासून या भागात वाहतूक ठप्प झाल्याने वाहनधारकांचे चांगलेच होत होत आहेत. बोगद्याच्या सदोष कामामुळे पाण्याचा निचरा होत नसल्याने वाहनधारकांनी प्रशासनाविषयी चांगलाच रोष व्यक्त केला. सोमवारी सायंकाळी साडेसात वाजेपासून दमदार पावसाला सुरूवात झाली तर सुमारे अडीच तास चाललेल्या मुसळधार पावसामुळे तब्बल 51 मिलीमीटर पाऊस झाल्याची नोंद करण्यात आली.

बोगदा वाहतुकीसाठी रात्रीपासून बंद
शहरातील सखल भागात मोठ्या प्रमाणावर पाणी साचल्याने नागरिकांचे हाल झाले. शहरातील नाल्यांची सफाई झाली नसल्याने नाल्याकाठच्या नागरिकांना त्यामुळे चांगलाच मनस्ताव सोसावा लागला तर पालिकेचे ढिसाळ नियोजनही त्यानिमित्त समोर आले. शहरातील बसस्थानकातही मोठ्या प्रमाणावर चिखल निर्माण झाल्याने प्रवाशांना मनस्ताप सोसावा लागला. शहरातील रेल्वेच्या झोनल ट्रेनिंग सेंटरजवळ सुरू करण्यात आलेल्या बोगद्यात सुमारे दोन फूटांपेक्षा जास्त पाणी साचले आहे. यामुळे या बोगद्यातून येणार्‍या जाणार्‍या वाहनधारकांना त्रास होत असून बोगद्यात वाहने बंद पडत असल्याने वाहतूक बंद करण्यात आली आहे.