युटीएस अ‍ॅपद्वारे रेल्वेला पाच महिन्यात दोन कोटींचा महसूल

भुसावळ विभागात जनजागृती
रेल्वे तिकीट खिडकीवर तिकीट काढण्यासाठी अनेकदा प्रवाशांची गर्दी होते त्यामुळे इच्छीतवेळी तिकीट घेण्यास उशीर होतो वा त्यावेळी रेल्वे निघून जाते त्यामुळे या सर्व त्रासापासून वाचण्यासाठी युटीएस अ‍ॅप उत्तम पर्याय आहे. अनारक्षित तिकीट काढताना रेल्वे प्रवाशांचा वेळ वाचावा आणि प्रवाशांना रांगेत उभे राहण्याच्या त्रासापासून दिलासा मिळावा यासाठी वरिष्ठ विभागीय वाणिज्य व्यवस्थापक अजय कुमार यांच्या मार्गदर्शनाखाली वाणिज्य कर्मचार्‍यांद्वारे भुसावळ विभागातील विविध स्थानकांवर जनजागृती मोहिम राबविण्यात येत आहे. वाणिज्य रेल्वे कर्मचार्‍यांनी युटीएस अ‍ॅप वापरण्यासाठी प्रोत्साहित केल्याने मध्य रेल्वेच्या भुसावळ विभागाने जानेवारी 2024 ते मे 2024 या कालावधीत एकूण आठ लाख 59 हजार प्रवासी तिकिटे यशस्वीरित्या जारी केली असून त्यातून एकूण दोन कोटी रुपयांचा महसूल विभागाला प्राप्त झाला आहे.

हार्डकॉपीची आवश्यकता नाही
भुसावळ विभागातील सर्व स्थानकांवर ऑनलाईन अनारक्षित रेल्वे तिकीट बुकिंगसाठी यूटीएस ऑन मोबाईल अ‍ॅप सुविधा उपलब्ध आहे. युटीएस ऑन मोबाइल अ‍ॅप लाँच करण्याचा उद्देश डिजिटल तिकीट मोडला प्रोत्साहन देणे, सेल्फ-तिकीटिंगला प्रोत्साहन देणे आणि प्रवाशांना रांगेचा त्रास न होता तिकीट खरेदी करता यावे हा उद्धेश आहे. यूटीएस मोबाइल अ‍ॅपमुळे प्रवाशांना पेपरलेस प्रवासाची तिकिटे, सीझन तिकीट आणि प्लॅटफॉर्म तिकीट थेट मोबाइल यूटीएस अ‍ॅपद्वारे मिळते व बुक केलेली तिकिटे अ‍ॅपमध्ये पाहिली जाऊ जातात व हार्डकॉपीची देखील आवश्यकता नाही त्यामुळे रेल्वेत कागदाचीदेखील मोठी बचत होत आहे.

अधिकाधिक प्रवाशांनी करावा अ‍ॅपचा वापर
डिजिटल तिकीट विक्रीला युटीएस अ‍ॅपद्वारे प्रोत्साहन मिळाले आहे. सेंट्रल रेल्वेने 660 विशेष हॉलीडे गाड्या चालवल्या व या गाड्यांमधील प्रवाशांनी डिजिटल तिकीटाला पसंती दर्शवत चांगले नागरिक होण्याचे कर्तव्य निभावले. या माध्यमातून रेल्वेच्या तिकीट खर्चातचही निश्चित बचत झाली असून तिकीटाच्या रांगेतील गर्दी कमी झाली आहे. वापरण्यास अत्यंत सुलभ असलेल्या युटीएस अ‍ॅपद्वारे डिजिटल तिकीट मोबाईलमध्ये असल्याने तिकीट हरवण्याची भीती नाही शिवाय त्यामुळे तिकीट खिडकीवर आता रांगेत उभे राहण्याची गरज नसल्याचे डीआरएम ईती पांडे ‘दैनिक तरुण भारत’शी बोलताना म्हणाल्या.