पोलीस ठाण्याच्या आवारात स्वीकारली 20 हजारांची लाच : जळगावातील दोन्ही लाचखोर हवालदारांना दोन दिवसांची पोलीस कोठडी
Accepted a bribe of 20 thousand in the police station premises जळगाव (12 एप्रिल 2025) : जळगाव शहर पोलीस ठाण्याच्या आवारात स्वीकारणार्या दोन हवालदारांना जळगाव एसीबीने 20 हजारांची लाच घेताना अटक केली होती. ही कारवाई शुक्रवारी सायंकाळी उशिरा करण्यात आल्यानंत पोलीस दलात प्रचंड खळबळ उडाली होती. संशयीताना शनिवारी न्यायालयात हजर केले असता 14 एप्रिलपर्यंत पोलीस कोठडी सुनावण्यात आली.
कौटूंबिक छळ प्रकरणात दाखल असलेल्या गुन्ह्यात अटक न करण्यासाठी व प्रकरणात सहकार्य करण्यासाठी तडजोडीअंती 20 हजारांची लाच मागून ती स्वीकारताना जळगाव एसीबीने शहर ठाण्यातील हवालदार रवींद्र प्रभाकर सोनार (47) व हवालदार धनराज निकुंभ (45) यांना अटक केली.
42 वर्षीय तक्रारदार हे केंद्रीय अर्ध सैनिक बलात कॉन्स्टेबल पदावर कार्यरत आहेत. त्यांचे कौटुंबिक कारणावरून पत्नीशी भांडण झाल्यानंतर पत्नीने तक्रारदाराविरोधात 4 फेब्रुवारी 2025 रोजी जळगाव शहर पोलीस स्टेशनला तक्रार दिल्यावरून गुन्हा दाखल करण्यात आला होता. या गुन्ह्याच्या चौकशी कामी आरोपी हवालदार रवींद्र सोनारने तक्रारदाराला चौकशीकामी पोलीस ठाण्यात बोलावले होते. यावेळी धनराज निकुंभ सोबत भेट घातलण्यात आली व कौटुंबिक छळाच्या गुन्ह्यात अटक न करण्यासाठी, योग्य ती मदत करण्यासाठी तसेच त्यांचा वरिष्ठ अधिकार्यांना अहवाल न पाठवण्यासाठी निकुंभ याने 50 हजारांची लाच मागितली होती.
काम करीत असलेल्या पोलीस ठाण्यात दाखल झाला गुन्हा
निकुंभ याने लाच देण्यासाठी सातत्याने तगादा लावल्यानंतर 11 एप्रिल रोजी जळगाव एसीबीकडे तक्रार नोंदवण्यात आली. पडताळणी दरम्यान निकुंभ याने 50 हजारांची लाच मागून 20 हजार रुपये स्वीकारण्याची तयारी दर्शवल्यानंतर सापळा रचण्यात आला. जळगाव शहर पोलीस ठाण्याच्या आवारात शुक्रवारी सायंकाळी आरोपी हवालदार रवींद्र सोनार यांनी 20 हजारांची लाच स्वीकारताच त्यास अटक करण्यात आली तर प्रकरणात आरोपी निकुंभचा सहभाग आढळल्याने त्यास शनिवारी सकाळी अटक करण्यात आली. दोघा लाचखोरांविरोधात जळगाव शहर पोलीस स्टेशनला गुन्हा दाखल करण्यात आला.
अधिक तपास पोलीस अधीक्षक शर्मिष्ठा घारगे-वालावलकर यांच्या मार्गदर्शनाखाली जळगाव एसीबीचे पोलीस उपअधीक्षक योगेश ठाकूर, पोलीस निरीक्षक स्मिता नवघरे व सहकारी करीत आहेत.
