24-year-old dies after being electrocuted चोपडा (30 एप्रिल 2025) : शेतातील लोकल लाईनचा तार जोडण्यास गेलेल्या वढोदा येथील 24 वर्षीय तरुणाचा विजेचा धक्का लागून दुर्दैवी मृत्यू झाला. ही घटना मंगळवार, 29 रोजी सायंकाळी पाच वाजता घडली. याप्रकरणी चोपडा ग्रामीण पोलीस स्टेशनला अकस्मात मृत्यूची नोंद करण्यात आली. दीपक तुकाराम पाटील (24, रा.वढोदा, ता.चोपडा) असे मयताचे नाव आहे.
वढोदा येथील रहिवासी व सनपुले येथील आश्रमशाळेचे शिक्षक ज्ञानेश्वर गोरख पाटील यांच्या वढोदा शिवारात शेतातील शेत पंपाचा वीजपुरवठा खंडीत झाल्याने तो सुरळीत करण्यासाठी ज्ञानेश्वर पाटील हे दीपक पाटील यांना शेतात घेऊन गेले. यावेळी दीपक वीजपुरवठा सुरळीत करण्यासाठी विजेच्या खांबावर चढताच त्याला जबर शॉक लागल्याने त्याचा जागीच मृत्यू झाला.
तरुणाच्या पश्चात आई, वडील, बहिण असा परिवार आहे. मृत तरुणाचे वडील तुकाराम पाटील व आई छोटाबाई पाटील हे शेतमजुरी करून आपला उदरनिर्वाह करतात. मनमिळाऊ दीपकचा दुर्दैवी अंत झाल्याने पाटील परिवाराला धक्का बसला आहे. या घटनेमुळे वढोदा गावावर शोककळा पसरली आहे. याप्रकरणी चोपडा ग्रामीण पोलीस स्टेशनला अकस्मात मृत्यूची नोंद करण्यात आली.
