नारायणदास अग्रवाल यांनी नेहमीचं शिक्षण संस्थेच्या हिताचा विचार केला !
चाळीसगावला झाला क्रीडा संकुल नामकरण सोहळा : खासदार स्मिता वाघ, आमदार मंगेश चव्हाण यांची उपस्थिती, मानपत्र देऊन गौरव
चाळीसगाव (26 सप्टेंबर 2025) : पूर्वी गावा-गावात शाळा उभ्या राहिल्या त्या दातृत्वातून मिळालेल्या जमिनींवर. लोक सहज दोन-चार एकर जागा शाळेसाठी दान देत. तथापि, सध्याची परिस्थिती बदलली आहे. अनेक शिक्षण संस्थांमध्ये वाद-विवाद आहेत. चाळीसगाव एज्युकेशन सोसायटीने मात्र आपल्या 116 वर्षाच्या वाटचालीत पालकांचा विश्वास मिळवितांना विद्यार्थ्यांच्या गुणवत्ता वाढीला अग्रक्रम दिला. यात संस्थेच्या व्यवस्थापन मंडळाचे अध्यक्ष नारायणदास अग्रवाल यांचे 60 वर्ष संस्थेसाठी अविरत योगदान आहे. त्यांचे नाव क्रीडा संकुलास देऊन संचालक मंडळाने कृतज्ञता व्यक्त केली आहे. अशी कौतुक वाटणारी उदाहरणे कमी घडतात. अशा भावना जळगाव लोकसभा मतदार संघाच्या खासदार स्मिता वाघ यांनी येथे व्यक्त केल्या. त्या चाळीसगाव एज्युकेशन सोसायटीने चाळीसगाव महाविद्यालयात उभारलेल्या क्रीडा संकुलाच्या नामकरण सोहळ्यात उदघाटक म्हणून बोलत होत्या. हा सोहळा गुरुवारी दुपारी पार पडला.
यांची व्यासपीठावर उपस्थिती
व्यासपीठावर अध्यक्षस्थानी आमदार मंगेश चव्हाण यांची तर प्रमुख अतिथी म्हणून माजी आमदार साहेबराव घोडे, संस्थेच्या व्यवस्थापन मंडळाचे अध्यक्ष नारायणदास अग्रवाल, संस्थाध्यक्ष रामकृष्ण पाटील, उपाध्यक्ष मिलिंद देशमुख, संस्थेच्या व्यवस्थापन मंडळाचे उपाध्यक्ष योगेश अग्रवाल, सचिव डॉ.विनोद कोतकर, महाविद्यालयाचे अध्यक्ष सुरेश स्वार, कनिष्ठ महाविद्यालयाचे अध्यक्ष शामलाल कुमावत, विश्वस्त मोतीचंद बुंदेलखंडी, सुशिल अग्रवाल, अ. वि. येवले, शशिकांत धामणे यांच्यासह अड. प्रदीप अहिरराव, भोजराज पुंन्शी, जितेंद्र वाणी, अशोक वाणी, नीलेश छोरिया, प्राचार्य डॉ. मिलिंद बिल्दीकर, उपप्राचार्य डॉ. अजय काटे, विविध विभागांचे मुख्याध्यापक आदि उपस्थित होते.
विद्यार्थ्यांसाठी शिक्षणाची गंगा वाहती
समाजातील सज्जनशक्ति आणि माणसांमधील चांगुलपणा जोपर्यंत शाबूत आहे, तोवर राजकारणात लोकोपयोगी काम करणार्‍या लोक डोक्यावर घेतील. हाचं धागा पकडून चाळीसगाव एज्युकेशन सोसायटीने जातीपातीच्या पलिकडे जाऊन विद्यार्थ्यांसाठी शिक्षणाची गंगा वाहती ठेवली आहे. एखाद्या संस्थेत एखाद्या व्यक्तिने 60 वर्ष नेतृत्व करावे, हे दूर्मिळ उदाहरण नारायणदास अग्रवाल यांनी सप्रमाण सिद्ध केले आहे. संस्थेने नवनविन अभ्यासक्रम सुरू करावेत. कौशल्याधिष्ठीत अभ्यासक्रमांची आजच्या काळात गरज आहे. संस्थेच्या मदतीसाठी माझे नेहमी नेहमी सहकार्य असेल, असे आमदार मंगेश चव्हाण यांनी आपल्या अध्यक्षीय मनोगतात आश्वासीत केले.
योगेश अग्रवाल यांनी संस्थेत सुरू असलेल्या विविध नवोपक्रमांची माहिती दिली. प्रास्ताविकात डॉ. कोतकर यांनी संस्थेच्या क्रीडा क्षेत्रातील विद्यार्थ्यांच्या चढता आलेख विषद केला. साहेबराव घोडे यांनीही मनोगत व्यक्त केले.
यावेळी अग्रवाल यांचा मानपत्र देऊन गौरव करण्यात आला. मानपत्राचे शब्दांकन उपशिक्षक जिजाबराव वाघ यांनी केले होते. सूत्रसंचालन प्रा.डॉ.वि.रा.राठोड यांनी तर आभार अ‍ॅड.प्रदीप अहिरराव यांनी मानले.
मंगेश चव्हाण यांच्यामुळे मी ‘खासदार’ झाले
जळगाव लोकसभा मतदार संघातील माझा विजय हा आमदार मंगेश चव्हाण यांच्यामुळेचं साकारला त्यांच्यामुळे मी खासदार झाले. अशी प्रांजळ भावनाही यावेळी खासदार स्मिता वाघ यांनी व्यक्त केली. याला उपस्थितांनी टाळ्यांचा गजर करीत दाद दिली. यावर आपल्या भाषणात आ. चव्हाण यांनीही खुमासदार उत्तर दिले. ते म्हणाले, खासदारकीच्या निवडणुकीत योग्य व्यक्तिला संधी मिळावी आणि चुकीच्या व्यक्तिला नाकारावे. याचं भूमिकेतून मी आणि चाळीसगाव तालुक्यातील कार्यकर्त्यांनी काम केले. जनतेने त्याला प्रतिसाद दिला. तुमच्या विजयाला अशी पार्श्वभूमी आहे. असेही आमदार चव्हाण यांनी स्पष्ट केले.
