Ajit Pawar clearly stated : I do not agree with the position of the Women’s Commission! मुंबई (30 ऑक्टोबर 2025) : फलटणमधील महिला डॉक्टरांच्या आत्महत्या प्रकरणात महिला आयोगाच्या अध्यक्षा रुपाली चाकणकर यांनी घेतलेल्या भूमिकेमुळे मोठा वाद निर्माण झाला आहे. पीडितेच्या वडिलांनीही चाकणकर यांच्या वक्तव्यावर तीव्र आक्षेप घेत थेट उपमुख्यमंत्री अजित पवार यांच्याकडे तक्रार केल्यानंतर उपमुख्यमंत्री अजित पवार यांनी महिला आयोगाच्या भूमिकेशी सहमत नसल्याचे सांगितले आहे.
नेमके काय म्हणाले अजित पवार?
मी नेहमी सत्याच्या बाजुने असतो. रुपाली चाकणकर यांच्या मताशी आम्ही सहमत नाही. या संदर्भात आम्ही त्यांना विचारणा करणार असून त्यांच्या मताचे कोणीही आम्ही समर्थन करणार नाही तसेच त्यांनी असे का केले ? याचे कारण विचारणार असल्याचे अजित पवार यांनी सांगितले. याशिवाय, या प्रश्नावर आपण मुख्यमंत्री एकनाथ शिंदे यांच्याशी देखील चर्चा करण्याचे आश्वासन अजित पवारांनी कुटुंबीयांना दिले आहे.
रुपाली चाकणकरांच्या भूमिकेवर सवाल
रुपाली चाकणकर यांना यापूर्वीही वैष्णवी हगवणे आणि तनिषा भिसे प्रकरणांत त्यांच्या भूमिकेमुळे टीकेचा सामना करावा लागला होता. आता फलटण प्रकरणामुळे त्या पुन्हा एकदा विरोधकांच्या निशाण्यावर आल्या आहेत.
दरम्यान, फलटणमधील डॉक्टर तरुणीने आत्महत्येपूर्वी आपल्या तळहातावर सुसाईड नोट लिहून ठेवली होती. यामध्ये तिने पोलिस अधिकारी पीएसआय गोपाळ बदने याच्याकडून चार वेळा बलात्कार झाल्याचा आणि प्रशांत बनकर यांच्याकडून मानसिक छळ झाल्याचा उल्लेख केला होता. तिच्या पत्रामध्ये राजकारण्यांकडून दबाव असल्याचेही नमूद करण्यात आलेले आहे. चाकणकर यांनी ज्या प्रकारे या प्रकरणाचा निष्कर्ष काढण्याचा प्रयत्न केला त्यामुळे विरोधकांकडून तीव्र संताप व्यक्त होत आहे.
