चुकीच्या कामांना आपले कदापि समर्थन नाही : पार्थ पवार प्रकरणातील टीकेनंतर अजित पवारांची भूमिका
मुंबई (6 नोव्हेंबर 2025) : राज्याचे उपमुख्यमंत्री अजित पवारांचे सुपुत्र पार्थ पवार यांच्या कंपनीकडून चारशे एकर जमीन अवघ्या तीनशे कोटीत खरेदी झाली शिवाय हा व्यवहार करताना केवळ 500 रुपयांच्या स्टँप ड्युटीवरुन ही खरेदी झाल्याने शासनाचा तब्बल 21 कोटी रुपयांचा महसूल बुडवण्यात आला. हा प्रकार समोर येताच विरोधकांनी अजित पवारांवर निशाणा साधत टीका केली असून त्यांच्या राजीनाम्याची मागणी केली. उपमुख्यमंत्री अजित पवार यांनी या प्रकरणी आपले प्रतिक्रिया व्यक्त करताना चुकीच्या कामांना आपले कदापि समर्थन नसल्याचे म्हटले आहे.
पवार म्हणाले, मुख्यमंत्र्यांनी करावी चौकशी
अजित पवार माध्यमांसमोर आल्यानंतर म्हणाले की, माझा त्या व्यवहाराशी दुरान्वये संबंध नाही, मी कुणालाही फोन केला नाही किंवा चुकीच्या कामाला माझं कसलंही समर्थन नाही, अशी प्रतिक्रिया अजित पवार यांनी दिली. तसेच, मुख्यमंत्र्यांनी जरुन चौकशी करावी. मला त्याबद्दल एवढंच सांगायचं आहे की, मला याबाबत काहीही माहिती नाही. सध्या चॅनेलमध्ये जे काही चाललंय, जे प्रश्न आहेत, त्याची मी माहिती घेईन. कारण, मागे 3-4 महिन्यांपूर्वीही अशा-अशा गोष्टीचं काहीतरी चालल्याचं कानावर आलं. त्यावेळेसच मी सांगितलं की, असलं काहीही चुकीचं केलेलं मला चालणार नाही, असल्या चुकीच्या गोष्टी कुणीही करू नका, अशा स्पष्ट सूचना मी दिलेल्या होत्या, परंतु त्यानंतर काय झालं ते मला माहिती नाही.
चौकशीसाठी समिती गठीत : सात दिवसांत अहवाल
पुणे जमीन गैरव्यवहार प्रकरणी चौकशी समिती गठीत करण्यात आली आहे. मुद्रांक शुल्क चुकविल्याप्रकरणी समिती तपास करणार आहे. नोंदणी उपमहानिरीक्षक यांच्या अध्यक्षतेखाली पाच सदस्यीय समिती गठीत करण्यात आली आहे. सात दिवसांत चौकशी करुन अहवाल सादर करण्याचे आदेश नोंदणी महानिरीक्षकांनी दिले आहेत. नोंदणी महानिरीक्षक सुहास दिवसे यांच्या आदेशान्वये ही समिती काम करेल. या प्रकरणातील तहसीलदार आणि दुय्यम निबंधकांचे तत्काळ निलंबन करण्यात आले आहे.
