मुलीच्या राजेशाही साखरपुड्यावरून ट्रोल होताच इंदुरीकर महाराजांनी दिले ‘हे’ स्पष्टीकरण
अहिल्यानगर (6 नोव्हेंबर 2025) : आपल्या कीर्तनातून अध्यात्मासह अंधश्रद्धेवर प्रहार करताच विनोदी शैलीने विविध विषयांवर मार्मिक भाष्य करणारे इंदुरीकर महाराज अलीकडेच मुलीच्या राजेशाही साखरपुड्यावरून सोशल मिडीयात चांगलेच ट्रोल होताना दिसून येत आहेत. सोशल मिडीयातील वाढत्या टिकेनंतर त्यांनी याबाबत स्पष्टीकरण देत एवढ्या मोठ्या पद्धतीने साखरपुडा हा तुम्हाला दाखवण्यासाठीच केला, असल्याचे ते म्हणाले आहेत.
टीकाकारांचे महाराजांनी टोचले कान
इंदुरीकर महाराज म्हणाले, मला तक्रार आली की मी हे लग्न साध्या पद्धतीने करा, असे सांगतो आणि मुलीचा साखरपुडा थाटामाटात केला. 20 वर्षे लोकांनी नाव ठेवली तेच सहन करत आलो. पण आता इथून पुढे विशिष्ट व्यक्तीचा सत्कार करायचा नाही, असा बदल करण्याचं ठरवलं. करायचा तर सगळ्यांचाच नाहीतर एकाचाही नाही. एवढ्या मोठ्या पद्धतीने साखरपुडा हा तुम्हाला दाखवण्यासाठी केला. की आपण बदल करू शकतो.
बदल करण्याची ताकद आपल्यामध्ये आहे. साखरपुड्यात जेवण महाराष्ट्रीयन पद्धतीने ठेवलं. चायनीज वगैरे आपल्याकडे चालणार नाही. त्याच्यासाठी आठ दिवस वाद केला पण जेवण महाराष्ट्रीयनच ठेवलं. जेवण वाढणार्‍यांचा ड्रेस वारकर्‍यासारखा ठेवला. कारण सगळ्यांना समान वागणूक. सगळ्यात महत्त्वाचं म्हणजे खुर्ची नाही. ज्याला आजार आहे त्यांनीच खुर्चीवर बसायचं. वारकरी संप्रदायाने जगाला एकात्मता आणि संघटन कौशल्य शिकवले. कोणाला कमी पाहिलं नाही. कोणाची स्तुती केली नाही. निंदा केली नाही. मी शेतकर्‍याचा मुलगा आहे. लोकांचा आशीर्वादाने इथपर्यंत पोहोचलो, असे इंदुरीकर महाराज म्हणाले.
साखरपुड्यामुळे महाराजांवर टीका
कीर्तनकार इंदुरीकर महाराज यांनी नुकताच लेकीचा साखरपुडा संगमनेर येथील वसंत लॉन्समध्ये थाटामाटात केला. याचे व्हिडिओ सोशल मीडियावर जोरदार व्हायरल झाले. मुलीची आणि जावयाची रथावरून मिरवणूक, पाहुण्यांच्या उपस्थितीने गच्च भरलेलं कार्यालय, वारकरी वेशात टाळकरी असा थाटामाटात साखरपुडा केल्यानंतर समाजातील विविध स्तरांमधून त्यांच्यावर टीका झाली.
