माझ्यावर आरोप होताच राजीनामा दिला आता अजित पवारांनीही राजीनामा द्यावा ! : आमदार एकनाथराव खडसे
I resigned as soon as allegations were made against me, now Ajit Pawar should also resign!: MLA Eknathrao Khadse जळगाव (6 नोव्हेंबर 2025) : महसूल मंत्री असताना माझ्या कुटुंबावर अनेक आरोप झाले. वास्तविक जमीन खरेदी प्रकरणाशी माझा थेट संबंध नसतानाही मंत्रिपदाचा राजीनामा दिला होता मात्र आता उपमुख्यमंत्री अजित पवार यांच्या मुलाचे नाव जमीन खरेदी प्रकरणात समोर आल्यानंतर माझ्यावर आरोप करणारे आता शांत कसे? असा सवाल राष्ट्रवादीचे ज्येष्ठ नेते आमदार एकनाथराव खडसे यांनी उपस्थित करीत अजित पवारांनी नैतीकतेला धरून राजीनामा देण्याची मागणी केली.
नैतीकता ठेवून द्यावा राजीनामा
ज्ळगावात आमदार एकनाथराव खडसे माध्यमांशी बोलताना म्हणाले की, पुण्यातील कोरेगाव पार्कमधील 40 एकरावरील जमिनीच्या व्यवहारावरून उपमुख्यमंत्री अजित पवार यांचे पुत्र पार्थ पवार वादाच्या भोवर्‍यात सापडले आहेत. या प्रकरणाची चौकशी पूर्ण होईपर्यंत अजित पवार यांनी नैतिक जबाबदारी स्वीकारून आपल्या पदाचा राजीनामा द्यावा.
संपूर्ण व्यवहारातच बनवा-बनवी उघड
आमदार खडसे म्हणाले की, संपूर्ण व्यवहारात मोठ्या प्रमाणावर गैरव्यवहार आणि बनवाबनवी झाली आहे. संबंधित जमीन महार वतनाची असल्याने तिच्या खरेदीसाठी महसूल आयुक्तांची पूर्व परवानगी आवश्यक असून या प्रकरणात अशी कोणतीही परवानगी घेतल्याचे समोर दिसून येत नाही त्यामुळे हा व्यवहार बेकायदेशीर आहे. तो तात्काळ रद्द करण्यात यावा.
अमेडिया एंटरप्रायझेस एलएलपी कंपनीचे भागभांडवल केवळ एक लाख रुपये आहे, मग 300 कोटी रुपयांची जमीन खरेदी करण्यासाठी इतका मोठा पैसा संबंधितांकडे कसा आला ? कोणत्या खात्यातून पैसे दिले गेले ? आणि ते पैसे कोणाच्या खात्यात जमा झाले ?, असे प्रश्न खडसेंनी उपस्थित केले. त्या दृष्टीने संपूर्ण तपास होणे आवश्यक असल्याचे ते म्हणाले.
उच्च न्यायाधीशांनी करावी चौकशी
आमदार खडसे म्हणाले की, सरकार आपल्या सहकार्‍याच्या मुलाच्या कंपनीची चौकशी करणार असलीतरी हे जनतेच्या गळ्याखाली उतरणार नाही त्यामुळे या प्रकरणाची चौकशी उच्च न्यायालयाच्या न्यायाधीशांच्या देखरेखीखाली करण्यात यावी. त्या माध्यमातूनच संपूर्ण प्रकरणाची पारदर्शक आणि निष्पक्ष चौकशी होऊन खरे सत्य बाहेर येईल.
देवेंद्र फडणवीस यांनी अजित पवारांवर सुमारे 70 हजार कोटींच्या सिंचन घोटाळ्याचे आरोप केले होते. आता त्याच पवारांबरोबर ते सत्तेत बसले आहेत. मग त्यांच्या मुलाच्या चौकशीचे काय होणार? असाही सवाल खडसे यांनी उपस्थित केला.
