Plot to kill Maratha community leader Manoj Jarange Patil foiled : Two arrested बीड (6 नोव्हेंबर 2025) : मराठा समाजाचे नेते मनोज जरांगे पाटील यांना जीवे मारण्यासाठी अडीच कोटी रुपयांची सुपारी देण्यात आल्याची तक्रार जालना पोलिसांना मिळाल्यानंतर पोलिसांनी कारवाई करीत दोघांना अटक केली आहे. दरम्यान, मनोज जरांगे यांनी हत्येच्या कटाबाबत मोठा खुलासा करीत ज्याने हा कट रचला त्याचे नाव लवकरच समोर येणार असल्याचा दावा करीत समाजबांधवांना शांतता राखण्याचे आवाहन केले आहे.
काय म्हणाले जरांगे पाटील ?
ज्याने कट रचला त्याला इशारा देताना जरांगे म्हणाले की, बाळ तुला सांगतो तू खूप चुकीच्या ठिकाणी हात घातलास, असे आम्ही खूप बघितले आहेत. तू खूप चुकीचे पाऊल उचलले आहे. ज्यांनी कट रचला त्यांना मी इशारा देत आहे. आम्ही मराठे आहोत एवढे लक्षात ठेवावे, मी खंबीर आहे, मराठा बांधवांना मी विनंती करतो की तुम्ही शांत राहा, असे आवाहन देखील जरांगे यांनी केले आहे.
अडीच कोटी रुपयांची दिली सुपारी
जरांगे पाटलांच्या हत्येसाठी अडीच कोटी रुपयांची सुपारी देण्यात आली व जालना पोलिस अधीक्षकांना जरांगे पाटलांचे सहकारी गंगाधर काळकुटे यांनी तक्रार दिल्यानंतर, स्थानिक गुन्हे शाखेने तातडीने कारवाई केली आणि बीड जिल्ह्यातून दोन संशयितांना ताब्यात घेतले. ताब्यात घेतलेल्या व्यक्तींची नावे दादा गरुड आणि अमोल खुणे अशी आहेत. यापैकी अमोल खुणे हा जरांगे पाटील यांचाच पूर्वीचा सहकारी असल्याचे समोर आले असून, या दोघांची पोलिसांकडून कसून चौकशी सुरू आहे.
बड्या राजकीय नेत्याचे नाव
तक्रार मिळाल्यानंतर पोलिसांनी मध्यरात्री बीडमध्ये छापा मारून दोघांना चौकशीसाठी ताब्यात घेतले. प्राथमिक चौकशीत आरोपींनी एका मोठ्या राजकीय नेत्याचे नाव घेतल्याची माहिती सूत्रांकडून समोर येत आहे. मात्र पोलिसांनी अधिकृतरीत्या कोणतेही नाव जाहीर केलेले नाही.
महत्त्वाचे खुलासे होण्याची शक्यता
राज्यात या प्रकरणामुळे मोठी खळबळ उडाली आहे. कारण मनोज जरांगे पाटील हे सध्या मराठा आरक्षणाच्या चळवळीचे प्रमुख चेहरे आहेत आणि त्यांच्या नेतृत्वाखाली राज्यभर मोठं आंदोलन झालं आहे. त्यामुळे त्यांच्या हत्येचा कट रचल्याचा प्रकार समोर येणे ही अत्यंत गंभीर बाब मानली जात आहे. पोलिस तपासातून यामागे कोणत्या राजकीय शक्तींचा हात आहे का? हा प्रश्न आता पुढे आला आहे. या प्रकरणाचा सखोल तपास सुरू असून, आणखी काही महत्त्वाचे खुलासे होण्याची शक्यता वर्तवली जात आहे.
