धनंजय मुंडेंनी माझ्या हत्येचा कट रचला : मनोज जरांगे पाटील यांचा दावा
ऑडीओ क्लीपही ऐकवल्या : समाजासाठी रक्तही सांडण्याची तयारी
Dhananjay Munde plotted my murder : Manoj Jarange Patil claims जालना (7 नोव्हेंबर 2025) : मराठा समाजाचे आंदोलनकर्ते मनोज-जरांगे पाटील यांची हत्या करण्यासाठी अडीच कोटी रुपयांची सुपारी देण्यात आल्याचा आरोप झाल्यानंतर जालना पोलिसांनी दोघांना अटक केली होती. त्यानंतर आता मनोज जरांगे यांनी हत्येची सुपारी धनंजय मुंडेंनी दिल्याचा आरोप करीत खळबळ उडवून दिली आहे. मला ठार मारण्यासाठी अडीच कोटी रुपयांची सुपारी देण्यात आली व आज ही वेळ माझ्यावर आली आहे, उद्या इतर नेत्यावरही येईल त्यामुळे हा विषय गांभीर्याने घेण्याची गरज असल्याचे त्यांनी म्हणत काही ऑडीओ क्लीपही यावेळी ऐकवल्या.
अशी प्रवृत्ती राजकारणातून संपवली पाहिजे
जरांगे पाटील म्हणाले की, माझ्यासह इतर अनेक नेत्याबद्दल संशयित आरोपींकडे माहिती आहे, त्यांनी सावध राहणे गरजेचे आहे. जो व्यक्ती स्वत:च्या बहिणीविषयी वाईट बोलू शकतो. अशी प्रवृत्ती राजकारणातून संपवली पाहिजे. मुख्यमंत्री देवेंद्र फडणवीस यांनी याकडे लक्ष दिले पाहिजे, असे जरांगे पाटील म्हणाले.
जरांगे पाटील म्हणाले की, त्यांच्या आणि मुंडेंमध्ये वैयक्तिक वैर नाही, पण जे घडले ते चेष्टेचा विषय नाही. त्यांनी सांगितले की त्यांच्याकडे पोलिसांच्या अधीक्षकांना दिल्याच्या तक्रारीत आठ-दहा जणांची नावे आहेत आणि त्यात मुंडे यांचे नावही आहे. जरांगे यांनी स्पष्ट केले की, ते राजकीय हेतूने चेष्टा करीत नाहीत, तर सार्वजनिक सुरक्षा आणि आरक्षणाच्या प्रश्नांसंदर्भातील गंभीर बाब आहे. त्यांनी पुढे म्हटले की, जर कोणाच्याही शंका असेल तर तो नार्को टेस्ट करा, आणि ते स्वतःही त्यासाठी तयार आहेत.
तांत्रिक तपासणीची मागणी
ऑडिओ क्लिप संदर्भात जरांगे पाटील म्हणाले की त्यांच्याकडे काही रेकॉर्डिंग्स आहेत ज्यात धनंजय मुंडेंशी संबंधित काही आरोपींची माहिती आहे. त्यांनी ती क्लीप मीडियाला ऐकवली आणि सांगितले की, क्लिपमधील दोन व्यक्ती आरोपी आहेत. जरांगे यांनी धनंजय मुंडे यांना थेट विचारले की ते कोणत्या आरोपींना पाठवत होते आणि कोणाच्या माध्यमातून गाडी किंवा इतर सोयी उपलब्ध करून दिल्या जात होत्या. त्यांनी सीडीआर, ड्रोन मॅपिंग आणि इतर तांत्रिक तपासणीची मागणी केली आहे आणि त्या तपासण्या करूनच सत्य समोर यावे, असे त्यांनी म्हटले.
धनंजय मुंडेंवर कट रचल्याचा आरोप
माझ्या गाडीचा अपघात करत मला ठार मारण्याचा प्रयत्न होता, असा आरोप मराठा आंदोलनकर्ते मनोज जरांगे पाटील यांनी केला. बीडचा कांचन नावाचा माणूस आहे. तो धनंजय मुंडे यांचा कार्यकर्ता आहे, धनंजय मुंडे यांनी माझ्या विरोधात हे षड्यंत्र रचण्याचे काम केले आहे. मराठा समाजाच्या नेत्यांनी हा विषय गांभीर्याने घेणं गरजेचे आहे. कारण वेळ तुमच्यावरही येणार आहे. माझे तुमचे मतभेद असले तरी हा विषय गंभीर आहे. करणार्‍यापेक्षा करुण घेणारा सर्वात जास्त महत्त्वाचा आहे असे मी मानतो.
मनोज जरांगे पाटील म्हणाले की, अशा वृत्तीचा आपल्याला नायनाट करावा लागेल. आरक्षण, राजकारण हा विषय वेगळा आहे. पण जीवावर उठणे हा विषय खूप गंभीर आहे. आपण जर सावध नसतो तर यांचा बाप ठरलो नसतो असे जरांगे यांनी म्हटले आहे.
वंजारी तरुणांना गुन्हेगारीकडे वळवले
मनोज जरांगे पाटील म्हणाले की, तुम्ही जर आमच्याच मुळावर उठायला लागले तर आम्हाला खेटल्यावर काय होते हे तुम्हाला प्रत्यय आला आहे. तुला नाक घासत आंतरवालीमध्ये यावे लागले होते. तु किती खालच्या थराला जाऊ शकतो हे मला माहिती आहे. धनंजय मुंडे यांनी वंजारी तरुणांना गुन्हेगारीकडे वळवले. त्यांच्यामुळे जात बदनाम झाली. यामध्ये काही प्रशासकीय अधिकारी देखील त्यांना मदत करत.
पंकजा मुंडेंबद्दल वाईट वक्तव्य
मनोज जरांगे पाटील म्हणाले की, पंकजा मुंडे यांच्याबद्दल इतके घाण विचार आहे ते रेकॉर्डिंग ऐकून मला समजले. तुम्ही ते एका भाषणात ही ऐकले असतील. खासगीमध्ये त्यापेक्षाही जास्त वाईट शब्द त्यांनी वापरले आहेत. ज्या माणसाने जात उंचीवर नेली त्यांच्याबद्दल आणि त्यांच्या लेकीबद्दल असे वाईट बोलतो तो माणूस कसा असणार. सत्य काय आहे हे आरोपीकडून माहिती घ्या. त्यांच्यात दम नाही म्हणून असे नपूसंक चाळे करत आहे, ते खरे मर्द नाही. आरोपीकडे सर्व माहिती आहे.
गाडीने गाडी धडकून मारण्याचा प्लॅन
मनोज जरांगे पाटील म्हणाले की, धनंजय मुंडे यांचा पीए की कार्यकर्ते यांनी मिळून हत्येचा कट रचला त्यामागे धनंजय मुंडे होते. त्यांनी भेट घेत कसा मारायचं याचा प्लॅन केला. गाडीने गाडी धडकून मारू, असा प्लॅन झाला. त्यासाठी परराज्यातील पासिंग असलेली गाडी देण्याची तयारी धनंजय मुंडे यांनी दाखवली, असा आरोपही मनोज जरांगे पाटील यांनी केला.
