चौधरी-खडसेंच्या अभद्र युतीला निपटून घेवू ! : वस्त्रोद्योग मंत्री संजय सावकारे
गणेश वाघ
जळगाव (7 नोव्हेंबर 2025) : भुसावळ नगराध्यक्षपदाचे आरक्षण मॅनेज असल्याचा धक्कादायक आरोप भुसावळातील माजी आमदार संतोष चौधरी व आमदार एकनाथराव खडसे यांनी करीत मंत्री संजय सावकारे यांच्यावर टीका केली होती. या आरोपांचा शुक्रवार, 7 रोजी जळगावात वस्त्रोद्योग मंत्री संजय सावकारे यांनी चांगलाच समाचार घेत नेत्यांना खडे बोल सुनावले. आमदार खडसे इतकी वर्ष राजकारणात काम करीत असून त्यांना आरक्षण कसे निघते? हे चांगले ठाऊक असताना त्यांच्याकडून असा आरोप होणे हास्यास्पद असल्याचे मंत्री सावकारे म्हणाले.
मागासवर्गीयांची मते हवीत मग आरक्षण का नको?
मंत्री संजय सावकारे म्हणाले की, आरक्षण मॅनेज करण्याच्या आरोप हास्यास्पद असून त्यांच्या मुर्खपणाच्या बोलण्यावर हसावे की रडावे हेच समजत नाही. नगरपालिकांमध्ये आरक्षण निघण्याची प्रक्रिया ही अत्यंत पारदर्शक असते. प्रत्येक पक्षाचे तेथे दोन-दोन प्रतिनिधी असतात व गेल्या 50 वर्षांपासून एस.सी.आरक्षण शहरात नसल्याने रोटेशन पद्धत्तीने हे आरक्षण निघाले आहे मात्र त्यांना राजकारणच कळत नसेल तर ही बाब अत्यंत दुर्दैवी असल्याचे सांगून मंत्री सावकारे यांनी आरक्षण कसे मॅनेज होईल? असा प्रश्नही मंत्री सावकारे यांनी उपस्थित केला.
अभद्र युतीला निपटून घेवू
आमदार खडसे व माजी आमदार चौधरी हे आपल्याविरोधात नगरपालिका निवडणुकीत एकत्र आल्याच्या प्रश्नावर मंत्री संजय सावकारे यांनी स्पष्ट केले की, गत विधानसभा निवडणुकीतही त्यांनी आपल्याविरोधात एकत्र येवून काम केले आहे त्यामुळे आता पालिका निवडणुकीत जरी ते एकत्र आले तरी त्यांना आपण निपटून घेवू, असा सूचक इशारा मंत्री सावकारे यांनी यावेळी दिला.
