Pune land scam case : Sheetal Tejvani spread abroad? पुणे (8 नोव्हेंबर 2025) : देशभरात प्रचंड गाजत असलेल्या मुंढवा आणि बोपोडी येथील जमीन गैरव्यवहार प्रकरणात दोन गुन्हे दाखल असलेली संशयीत शीतल किसनचंद तेजवाणी ही विदेशात पसार झाल्याची चर्चा आहे मात्र पुणे आणि पिंपरी-चिंचवड पोलिसांनी याबाबत अधिकृत दुजोरा दिलेला नाही.
दोन स्वतंत्र गुन्हे दाखल
तेजवाणी यांच्या विरुद्ध जमीन गैरव्यवहार प्रकरणात बावधन आणि खडक पोलिस ठाण्यात दोन स्वतंत्र गुन्हे दाखल झाले आहेत. नुकताच खडक पोलिस ठाण्यात दाखल असलेल्या गुन्ह्याचा तपास आर्थिक गुन्हे शाखेकडे वर्ग करण्यात आला., या दोन्ही जमीन गैरव्यवहार प्रकरणात उपमुख्यमंत्री अजित पवार यांचे चिरंजीव पार्थ पवार यांच्याशी संबंधित असलेली अमेडिया कंपनी सहभागी आहे.
पोलिसांकडील माहितीनुसार, कोरेगाव पार्क येथील चाळीस एकर जमीन खरेदीखत करताना, शासनाची फसवणूक केल्याप्रकरणी शीतल तेजवाणी, अमेडिया एंटरप्रायजेसचे संचालक दिग्विजय पाटील, सह दुय्यम निबंधक रवींद्र बाळकृष्ण तारू यांच्यावर बावधन पोलिस ठाण्यात गुन्हा दाखल आहे.
कृषी खात्याकडे बोपोडीतील पाच हेक्टर जमिनीचा ताबा असताना तहसीलदारांना हाताशी धरून जमिनीचा अपहार करून बेकायदा आदेश आणि पत्र तयार करून शासनाची फसवणूक केल्याच्या आरोपावरून तहसीलदार सूर्यकांत येवले, अमेडियाचे संचालक दिग्विजय पाटील, शितल तेजवाणी यांच्यासह खडक पोलिस ठाण्यात नऊ जणांविरोधात गुन्हा दाखल आहे. या दोन्ही गुन्ह्यात तेजवाणी संशयित आरोपी असून त्यांची भूमिका महत्त्वाची असल्याचे बोलले जाते. अशातच आता तेजवाणी पसार असल्याची चर्चा रंगत असून पुढील कारवाईकडे लक्ष लागले आहे.
