पुणे जमीन घोटाळ्यावरून लक्ष्मण हाकेंनी डिवचले : बापाने 70 हजार कोटी पचवूनही दिला नाही ढेकर !
पार्थ पवारांच्या घोटाळ्यावर ‘मुळशी पॅटर्न 2’ बनवण्याची उपरोधिक मागणी
Laxman Hake gets angry over Pune land scam : Father didn’t even digest 70 thousand crores, he belched ! पुणे (9 नोव्हेंबर 2025) : राज्याचे उपमुख्यमंत्री अजित पवार व त्यांचे पूत्र पार्थ पवार यांच्यावर पुणे जमीन घोटाळ्यावरून सातत्याने आरोपांच्या फैरी सुरू आहेत. त्यातच या प्रकरणावरून ओबीसी नेते लक्ष्मण हाके यांनी अजित पवारांना डिवचले आहे. बापाने 70 हजार कोटी रुपये पचवले, साधी ढेकर दिली नाही. पार्थ पवार 1500 कोटींच्या घोटाळ्यात सापडले. पार्थ पवारांच्या गंडलेल्या घोटाळ्यावर मुळशी पॅटर्न 2 चित्रपट बनावा, अशी उपरोधिक मागणी लक्ष्मण हाके यांनी केली.
अडचण वाढताच व्यवहार केला रद्द
अमेडीया कंपनीने तब्बल 1804 कोटी रुपयांच्या बाजारभावाची जमीन केवळ 300 कोटी रुपयांत विकत घेतल्याचा आरोप विरोधकांनी केला आहे. विशेष म्हणजे, या खरेदी व्यवहारानंतर अवघ्या दोन दिवसांतच स्टॅम्प ड्युटी माफ करण्याचे आदेश देण्यात आले त्यामुळे सरकारी नियमांचा भंग करून हा व्यवहार करण्यात आल्याचा आरोप विरोधकांनी केला. वाढत्या दबावानंतर अमेडीया कंपनीने हा जमीन खरेदी व्यवहार रद्द करण्याचा निर्णय घेतला. या संपूर्ण प्रकरणाची चौकशी करण्यासाठी राज्य सरकारने विशेष समितीची नेमणूक केली.
सोशल मिडीयावर पोस्ट टाकत डिवचलले
या घडामोडींवर ओबीसी नेते लक्ष्मण हाके यांनी टीकास्त्र सोडले. यासंदर्भात त्यांनी सोशल मीडियावर पोस्ट लिहून उपरोक्त उपरोधिक मागणी केली.
लक्ष्मण हाके यांनी पोस्ट जशीच्या तशी…
पार्थ पवारांच्या गंडलेल्या घोटाळ्यावर मुळशी पॅटर्न 2 चित्रपट बनावा. (पवार पॅटर्न बारामती )
1800 कोटींची महार वतनाची जागा 300 कोटीत लाटण्याचं काम पार्थ पवारने केलं. आई -वडिलांकडून मुले संस्कार शिकत असतात. पार्थ पवार दोन तीन वर्षांचे होते. तेव्हा अजित पवार व सुनेत्रा पवारांनी बारामतीच्या सोनगावमधील तीन एकर महार वतन लाटले आणि पार्थ पवारच्या नावे केले, अशी पत्रकार परिषद बहुजन नेते काळुराम चौधरी यांनी केली म्हणजे बारा-खडी शिकायच्या वयात सातबारा फिरवण्याची कला पार्थ पवारांना शिकवण्यात आली.
बापाने 70 हजार कोटी पचवले साधी ढेकर दिली नाही. पार्थ पवार 1500 कोटींच्या घोटाळ्यात सापडले. ‘नया है वह’ म्हणत त्यांना सोडूनच दिले जाईल. नवा जमीन घोटाळा करताना पार्थ पवारांनी जुन्या चुका करू नयेत.
उदा.
एक लाख रुपये भागभांडवल असणार्‍या संस्थेच्या माध्यमातून 300 कोटींचा व्यवहार करू नये.
शेकडो कोटींचा व्यवहार फक्त 500 रुपयांच्या स्टॅम्प पेपरवर करु नये.
सरकारी खात्याची जमीन खाजगी कंपनीकडे घेताना अधिकची काळजी बाळगावी.
भविष्य काळात मरिन ड्राईव्ह, ताज हॉटेल, मलबार हिल्स, विधानभवन अशा जागांवर हात मारावा. किरकोळ महार वतनांच्या जमिनींकडे दुर्लक्ष करावे.
प्रत्येकाकडे कला असते. पवारांच्या हातात जमीनी गायब करण्याची जादूची कांडी आहे. त्याचं व्यवस्थित प्रशिक्षण पार्थ पवारांनी घ्यावं. भविष्यात 15, 20 हजार कोटींच्या जमीन-खरेदीचा घोटाळा करावा.
राष्ट्रवादी काँग्रेसने सत्तेची शिखरं गाठली ती दलित, मुस्लीम, ओबीसी, उपेक्षित घटकांच्या नरडीवर टाच ठेवून. पुरोगामी महाराष्ट्राचं दुर्दैव हे आहे की, सरंजामी पद्धतीचं राजकारण करणार्‍यांच्या हाती महाराष्ट्राची सत्ता आहे. पार्थ पवारने महार वतनाची जमीन कंपनीच्या नावे केली तेव्हा जणांना उचलून आणलं? किती लोकांच्या मनात माती कालवली नेमकं या प्रकरणात काय काय घडलं असेल? याचं सत्य महाराष्ट्रापुढे येईल असे वाटत नाही.
