ठाकरे गटाला धक्का : चाळीसगावचे माजी खासदार उन्मेश पाटील यांच्यासह चौघांविरोधात पाच कोटी 33 लाखांची फसवणूक केल्याचा गुन्हा
Shock to Thackeray group: Former Chalisgaon MP Unmesh Patil and four others booked for fraud of Rs 5.33 crore चाळीसगाव (11 नोव्हेंबर 2025) : स्थानिक स्वराज्य संस्थांच्या निवडणुकांसाठी हिवाळ्यात राजकीय आखाडा तापला असतानाच चाळीसगावातून एक धक्कादायक बातमी समोर आली आहे. छत्रपती संभाजीनगर येथील देवगिरी नागरी सहकारी बँक लिमिटेडच्या चाळीसगाव शाखेची फसवणूक केल्याप्रकरणी ठाकरे गटाचे नेते व माजी खासदार उन्मेश पाटील यांच्यासह चौघांविरोधात पाच कोटी 33 लाख 85 हजार 356 रुपयांची फसवणूक केल्याप्रकरणी गुन्हा दाखल करण्यात आला आहे. निवडणुकीच्या तोंडावर या भागातील प्रभावशाली नेते असलेल्या उन्मेश पाटील यांच्या अडचणी वाढल्यानंतर सत्ताधारी आता त्यांची कोंडी करण्याची शक्यता आहे.
यांच्याविरोधात दाखल झाला गुन्हा
देवगिरी बँकेचे व्यवस्थापक जीवन नंदकिशोर राजुरकर (39) यांनी चाळीसगाव ग्रामीण पोलिसात दिलेल्या फिर्यादीनुसार, माजी खासदार उन्मेष भैय्यासाहेब पाटील, संजय शांताराम धनकवडे, प्रशांत राजेंद्र वाघ, प्रमोद नरहरराव जाधव (सर्व मे.उमंग व्हाईट गोल्ड प्रा.लि.चे संचालक) यांच्याविरोधात चाळीसगाव ग्रामीण पोलिसात फसवणुकीसह विविध कलमान्वये गुन्हा दाखल करण्यात आला. तपास प्रभारी सहाय्यक निरीक्षक नितीन पाटील करीत आहेत.
असे आहे फसवणूक प्रकरण
पोलिसात दाखल तक्रारीनुसार, संबंधितांनी ‘उमंग व्हाईट गोल्ड प्रायव्हेट लिमिटेड’ या कंपनीच्या नावाने औद्योगिक कर्ज घेतले गेले होते. कर्जाची रक्कम परतफेड न केल्याने ते एनपीए) घोषित झाले. त्यानंतर बँकेने कंपनीला परतफेडीसाठी संधी दिली, परंतु ती न झाल्याने बँकेने कायदेशीर कारवाई सुरू केली.
या काळात कंपनीच्या संचालकांनी बँकेकडे गहाण ठेवलेली मशिनरी संगनमताने विकली, असा गंभीर आरोप बँकेने केला त्यामुळे बँकेला कोट्यवधी रुपयांचे नुकसान झाले. या प्रकरणी देवगिरी नागरी सहकारी बँकेच्या चाळीसगाव शाखेचे व्यवस्थापक जीवन राजूरकर यांनी चाळीसगाव ग्रामीण पोलिस ठाण्यात तक्रार देताच गुन्हा दाखल करण्यात आला.
मंत्री महाजनांचे ते वक्तव्य अन् गुन्हा दाखल
मंत्री गिरीश महाजन व माजी खासदार उन्मेष पाटील यांच्यात भूखंड व्यवहारावरून आरोप-प्रत्यारोप सुरू असतानाच महाजन यांनी काही दिवसांपूर्वीच उन्मेष पाटील यांनी स्टेट बँकेसह इतर बँकांनाही गंडवले असल्याचा आरोप केला होता. त्या वक्तव्यानंतर केवळ तीन दिवसांनी या फसवणूक प्रकरणात गुन्हा दाखल झाल्याने चाळीसगाव तालुक्यात मोठी खळबळ उडाली आहे.
