चाळीसगाव (11 नोव्हेंबर 2025) : नाशिक येथे रविवार, 9 रोजी शक्ती शिखर फाउंडेशन व आर्ट फिनिक्स फाउंडेशन आयोजित महाराष्ट्र कलारत्न गौरव सोहळा मोठ्या थाटात नाशिक येथील आय सोला फार्म या निसर्गरम्य रिसॉर्टमध्ये झाला. यावेळी ज्यांनी कलाक्षेत्रात आपला वेगळा ठसा उमटवला आहे अश्या महाराष्ट्र भरातून 21 कलावंतांना सन्मानित करण्यात आले. त्यात चाळीसगाव येथील चित्रकार कवी दिनेश चव्हाण यांचा सन्मान झाला. त्यांचा गौरव के, के, वाघ युनिव्हर्सल समूहाच्या प्राचार्या अमृत आदित्य राव, कवी गीतकार विष्णू थोरे, समाजसेवक अनिल निरभवणे, सायकॉलॉजिस्ट डॉ, कुशल उगले, कलावंत विनोद मोरे यांचे उपस्थितीत पुरस्कृत करण्यात आले.
चित्रकार चव्हाण यांच्या कलाकृती सोशल मीडिया, वर्तमानपत्र, तसेच विविध मासिके, अंक यात बघावयास मिळतात, त्यांच्या नावावर फास्टेस्ट स्केच आर्टिस्ट हा जागतिक विक्रम नोंददेखील आहे. त्यांनी महाराष्ट्रभर अनेक साहित्यकृतीना मुखपृष्ठ दिले आहेत. अनेक सामाजिक, शैक्षणिक, कला, साहित्य क्षेत्रात बोधचिन्ह त्यांनी दिले आहेत, अनेक राज्य व राष्ट्रीयस्तरावरील साहित्य संमेलनाचे बोधचिन्ह त्यांनी आपल्या कलेतून साकारले आहे, ते साहित्यिक कवी देखील आहेत, त्यांच्या तीन साहित्यकृती प्रकाशित आहे, या अगोदर त्यांना साहित्य, कला, शिक्षणक्षेत्रात अनेक सन्मान, पुरस्कार प्राप्त आहेत.
