यावल (11 नोव्हेंबर 2025) : यावल नगरपरिषदेच्या सार्वत्रिक निवडणुकीकरिता उमेदवारी अर्ज भरण्याच्या पहिल्या दिवशी सोमवार, 10 रोजी एकही अर्ज विक्री झालेला नाही. नगराध्यक्ष तथा नगरसेवक पदाकरिता अर्ज विक्री तसेच ऑनलाईन अर्ज स्वीकृती सुरू होती मात्र नगरपालिका कार्यालयात पहिल्या दिवशी एकही उमेदवारी अर्ज येथे विक्री झाला नाही तसेच ऑनलाईन तसेच ऑफलाईन देखील एकही उमेदवारी अर्ज येथे प्राप्त झालेला नाही.
सहा दिवस उमेदवारी अर्जासाठी शिल्लक
यावल नगरपरिषदेत निवडणूक निर्णय अधिकारी म्हणून तहसीलदार मोहनमाला नाझीरकर, सहाय्यक निवडणूक निर्णय अधिकारी म्हणून अतुल गांगुर्डे हे कामकाज पाहत आहेत. लोकनियुक्त नगराध्यक्ष पद ओबीसी महिलेसाठी राखीव आहे. नगरसेवकांच्या 11 वॉर्डातील 23 जागेसाठी पहिल्या दिवशी विहित मुदतीत व वेळेत एकही अर्ज खरेदी कुणीही केलेला नाही. ऑनलाईन देखील अर्ज सादर केलेला नाही. दरम्यान आता उमेदवारी अर्ज दाखल करण्यासाठी सहा दिवस शिल्लक राहिले असून कोण-कोण निवडणूक रिंगणात उतरणार? याकडे लक्ष लागले आहे.
