बिहारातील विजयाचे श्रेय ईव्हीएम मशीनला ! : बच्चू कडूंचे विधान चर्चेत
भाजप स्थानिक पक्ष संपवणार; अजित पवार-शिंदे यांची गरज संपली
Credit for Bihar victory to EVM machine: Bachchu Kadu’s statement in discussion अमरावती (15 नोव्हेंबर 2025) : बिहारमध्ये झालेल्या विधानसभा निवडणुकीत भाजपा प्रणित एनएडीएला यश मिळाल्यानंतर माजी मंत्री बच्चू कडू यांनी केलेले धक्कादायक विधान राज्यात चर्चेत आले आहे. भाजपाने मिळवलेले हे यश त्यांचे वा मतदारांचे नसून तर ईव्हीएम मशीनचे असल्याचा दावा त्यांनी केला आहे. मुळातच मतदानात पारदर्शकता नसल्यामुळे हा जनतेचा कौल नाही तर मशीनची कामगिरी असून हे असेच होत राहिले तर लोकशाहीचे पतन झाल्याशिवाय राहणार नाही, असेही बच्चू कडू म्हणाले.
भाजपच्या कार्यालयात मतदान ठेवा
माजी मंत्री बच्चू कडू म्हणाले की, महाराष्ट्रातील स्थानिक स्वराज्य संस्थांच्या निवडणुकीत मशीन काम दाखवणार आहे. मतदारांच्या मताचा विषय संपलेला आहे. आता नगरपालिकेला व्हीव्हीपॅट दिसणार नाही मग तर विषयच संपला. आता मतदान केंद्रावर मतदान ठेवण्यापेक्षा ते भाजपच्या कार्यालयात ठेवले पाहिजे, असा टोलाही कडू यांनी लगावला आहे.
हा सर्व मशीनचा चमत्कार
बच्चू कडू म्हणाले की, निवडणुकीच्या तोंडावर 10 हजार रुपये महिलांच्या खात्यावर देण्याची योजनेत निवडणूक आयोगाने हस्तक्षेप करायला हवा होता. सत्तेचा वापर करत पैसा हाती देत निवडणूक लढवणे यावर आक्षेप घेतला पाहिजे. केवळ लाडक्या बहिणींमुळे हा चमत्कार झालेला नाही हा सर्व मशीनचा चमत्कार आहे. निवडणूक प्रक्रियेमध्ये पारदर्शकता नाही पण ती आली की चित्र बदललेल दिसेल.
भाजपाला स्थानिक पक्ष संपवायचे आहेत
बच्चू कडू म्हणाले की, सत्ताधार्‍यांना विरोधक संपवायचे आहेत. तुम्ही अचलपूर विधानसभेचे उदाहरण पाहिले पाहिजे तर तिथे माहोल आमचा होता आणि तिथे विजय दुसर्‍याच्या हाती गेला आहे. एकंदरीत हेच चित्र सर्व ठिकाणी आहे. भाजपला आता स्थानिक पक्ष संपवायचे आहे. त्यांना आता महाराष्ट्रात अजित पवार आणि एकनाथ शिंदे यांच्या पक्षाची गरज नाही त्यामुळे प्रत्येक राज्यात भाजप एकटे कसे पुढे जाईल हा प्रयत्न त्यांच्याकडून केला जात आहे.
