भुसावळ पालिका निवडणूक : ऑफलाईन अर्जाला नवीन शपथपत्र जोडावे लागणार ; आज सुटीच्या दिवशीही सुरू राहणार कामकाज

आजही दाखल करता येणार अर्ज
मुख्य प्रवेशद्वारासह प्रांताधिकारी कार्यालयात प्रवेश करण्याच्या आणि निवडणूक निर्णय अधिकारी यांच्या दालनाबाहेर असा तीन ठीकाणी पोलिसांचा चोख बंदोबस्त आहे. रविवारी सुध्दा उमेदवारी अर्ज दाखल करता येणार असल्याने कोणाचेही वाहन प्रांताधिकारी कार्यालयाच्या आत येऊ दिले जाणार नाही, कोणी बळजबरी करीत असेल तर त्यांच्यावर थेट कारवाईच्या सूचना देण्यात आल्या आहेत.

असे दाखल झाले अर्ज
शनिवारी निवडणूक निर्णय अधिकारी यांच्या कडे दाखल करण्यात आलेल्या अर्जांमध्ये प्रभाग 6 ब मधून 4, 11 अ -2, 25 ब-1, 10 ब – 1, 20 अ – 1, 20 ब – 2, 13 ब – 1, 3 अ-2, 21 अ – 2, 18 ब – 3, 9 अ – 2, 9 ब- 4, 15 ब – 2, 6 अ – 1, 11 ब – 1, 16 ब, 7 ब, 5 ब, 5 अ, 2 ब, 4 ब, 17 ब येथे प्रत्येकी एका उमेदवारांनी उमैदवारी अर्ज दाखल केला आहे.

ऑफलाईनचे शपथपत्र बदलावे लागणार
शनिवारी ज्या इच्छूक उमेदवारांनी ऑफलाईन उमेदवारी अर्ज घेतलेले आहे, त्यात 2018 पूर्वीचे शपथपत्र आहे, मात्र शनिवारी संध्याकाळी निवडणूक आयोगाच्या सूचना आल्या आहे की, जे ऑफलाईन अर्ज दाखल करणार आहे, त्या इच्छूक उमेदवारांनी नवीन शपथपत्र प्रांत कार्यालयातून घेऊन जावे, अथवा ऑनलाईन फॉर्म भरतांना ऑनलाईनमध्ये नवीन शपथपत्र येत आहे, ते भरावे, असे आवाहन निवडणूक निर्णय अधिकारी जितेंद्र पाटील यांनी केले आहे.

ऑफलाईन अर्ज गेले 325
शनिवारी ऑफलाईन अर्जांची प्रांताधिकारी कार्यालयाच्या आवारात विक्री करण्यात आली. यावेळी 177 इच्छूक उमेदवारांनी 325 उमेदवारी अर्ज घेतलेले आहे, यामुळे रविवार व सोमवारी उमेदवारी अर्जांचा पाऊसच पडणार आहे. अनेक उमेदवारांनी ऑनलाईन 300 पेक्षा जास्त अर्ज भरून ठेवले आहे, मात्र, अद्यापही सबमीट केलेले नाही, त्यामुळे ऑनलाईन सुध्दा अर्जांची संख्या वाढणार आहे. ऑफ लाईन अर्ज घेण्यासाठी इच्छूक उमेदवारांची रांग लागली होती.