भुसावळ पालिकेतील बोगस बिलांचा भ्रष्टाचार जनतेसमोर आणणार ! माजी आमदार संतोष चौधरी
Former MLA Santosh Chaudhary will bring the corruption of bogus bills in Bhusawal Municipality to the public! भुसावळ (16 नोव्हेंबर 2025) : भुसावळ शहराला लागून तापी नदी वाहते मात्र अद्यापही शहरवासीयांचा पाणीप्रश्न सुटलेला नाही, जनता पाण्यासाठी तहानलेली आहे. एकाच वर्षात रस्त्यांची दोन वेळा कामे करण्यात आली शिवाय पालिकेत अनेक बोगस बिले काढण्यात आली व हा भ्रष्टाचार आपण जनतेसमोर आणणार असून आमदार एकनाथराव खडसे यांनी हा प्रकार पुराव्यानिशी विधानसभेत मांडावा, अशी विनंती आपण त्यांना करणार असल्याचे माजी आमदार संतोष चौधरी येथे सांगितले. महाविकास आघाडीतर्फे नगराध्यक्ष पदाचा उमेदवार जाहीर झाल्यानंतर प्रसिद्धी माध्यमांशी बोलताना त्यांनी अनेक विषयांवर भाष्य केले.
आमची सत्ता आल्यास एक खिडकी योजना सुरू करणार
माजी आमदार संतोष चौधरी म्हणाले की, महाविकास आघाडीची सत्ता आल्यानंतर जनतेसाठी आम्ही एक खिडकी योजना सुरू करणार असून त्या माध्यमातून जनतेची कामे केली जातील. शहरातील व्यापारी बाहेर जावून व्यवसाय करीत आहेत, अशी हल्लीची स्थिती आहे, नऊ वर्षात शहरात एकही दुकान बांधण्यात आले नाही मात्र महाविकास आघाडीला सत्ता मिळाल्यानंतर सर्व चित्र बदलेल, असा विश्वास त्यांनी यावेळी व्यक्त केला.
