मुक्ताईनगरात आमदार चंद्रकांत पाटील यांच्या कन्येला शिंदे गटातर्फे नगराध्यक्षपदाची उमेदवारी
निवडणूक होणार चुरशीची : भाजपा विरोधात शिंदे गटात प्रमुख लढत
In Muktainagar, MLA Chandrakant Patil’s daughter is nominated for the post of mayor by the Shinde group मुक्ताईनगर (18 नोव्हेंबर 2025) : राज्याच्या राजकारणात नेहमीच लक्ष लागून असलेल्या मुक्ताईनगरात यंदा नगरपंचायतीची निवडणूक अत्यंत चुरशीची होण्याची चिन्हे आहेत. नगराध्यक्षपदासाठी शिंदे गटाचा उमेदवार कोण असणार याबाबत उत्सुकता असतानाच अखरेच्या क्षणी आमदार चंद्रकांत पाटील यांची कन्या संजना पाटील यांना शिवसेनेतर्फे लोकनियुक्त नगराध्यक्षपदाची उमेदवारी देण्यात आल्यानंतर येथे निवडणूक अत्यंत रंगतदार व चुरशीची होईल यात शंकाच नाही.
अखेरच्या दिवशी संजना पाटील यांना उमेदवारी
मुक्ताईनगर नगरपंचायत निवडणुकीसाठी सर्वसाधारण महिला हे आरक्षण निघाल्यामुळे यंदा मोठी चुरस निर्माण असेल हे स्पष्ट होते. शिवसेनेकडून आमदार चंद्रकांत पाटील यांची कन्या संजना पाटील यांना उमेदवारी मिळण्याची मागणी पक्षातील पदाधिकारी, कार्यकर्त्यांनी मागणी केली होती. तथापि, आमदार पाटील यांनी मात्र याला साफ नकार देत आपल्या घरातून कुणी उमेदवारी करणार नसल्याचे स्पष्ट केले होते.
मात्र मुक्ताईनगरात मोठ्या घडामोडी घडल्या व सोमवारी शेवटच्या दिवशी राष्ट्रवादी काँग्रेस-शरदचंद्र पवार पक्षाच्या मातब्बर नेत्यांनी भारतीय जनता पक्षात प्रवेश केला आणि त्यांना पक्षाने उमेदवारी दिली. एवढेच नव्हे तर भाजपाने नगराध्यक्षांसह सर्व जागांवर उमेदवार जाहीर करताच शिवसेनेने आपली रणनिती ऐन वेळेस बदलली.
कार्यकर्त्यांच्या मागणीनुसार आमदार चंद्रकांत पाटील यांच्या कन्या संजना चंद्रकांत पाटील यांना शिवसेना पक्षाची लोकनियुक्त नगराध्यक्षपदाची उमेदवारी जाहीर करण्यात आली. उमेदवारी अर्ज भरण्यासाठी अवघे काही तास उरले असतांना शिवसेनेच्या माध्यमातून आमदार चंद्रकांत पाटील यांच्या कन्या यांनी नगराध्यक्षपदाच्या लढतीत उतरल्यानंतर येथे अत्यंत चुरशीची निवडणूक पहायला मिळणार आहे.
