काँग्रेसमध्ये गटबाजीचा उद्रेक : नागपूरात पदाधिकारी व कार्यकर्त्यांचे सामूहिक राजीनामे
माजी मंत्री सुनील केदार यांच्या नेतृत्वावर प्रश्नचिन्ह
Outbreak of factionalism in Congress : Mass resignations of office bearers and workers in Nagpur नागपूर (19 नोव्हेंबर 2025) : नागपूरात काँग्रेसमध्ये गटबाजी उफाळली असून स्थानिक स्वराज्य संस्थांच्या निवडणुकांच्या पार्श्वभूमीवर पक्षाला मजबूत उभे करण्याऐवजी नागपूर काँग्रेसमध्ये नाराजीचा सूर वाढला आहे. वाडी नगरपरिषदेतील शहराध्यक्ष शैलेश थोराने आणि त्यांच्यासोबत सुमारे 120 कार्यकर्त्यांनी काँग्रेसमधून एकत्रीतपणे राजीनामे दिल्यानंतर राजकीय वर्तुळात खळबळ उडाली.
काय घडले नागपूरात
नागपूर ग्रामीण काँग्रेसमध्ये सुरू असलेले हे मोठ्या प्रमाणातील राजीनामे पक्षासाठी गंभीर धोक्याची घंटा असल्याचे मानले जाते. विशेष म्हणजे, काँग्रेसने वाडी नगराध्यक्ष पदासाठी नुकताच राष्ट्रवादी काँग्रेस शरद पवार गटातून आलेल्या प्रेम झाडे यांना उमेदवारी दिली मात्र प्रेम झाडे यांनी त्याच नगराध्यक्ष पदासाठी राष्ट्रवादीकडूनही अर्ज भरल्याचे उघड झाले. यामुळे काँग्रेसमधील स्थानिक कार्यकर्त्यांचा असंतोष आणखी तीव्र झाला.
यांनी दिले राजीनामे
या प्रकारानंतर नागपूर तालुका काँग्रेसचे अध्यक्ष प्रकार कोकाटे आणि जिल्हा काँग्रेसचे महासचिव अनिल पाटील यांसारखे पदाधिकार्‍यांनी राजीनामे दिले. आपल्या राजीनाम्यात त्यांनी सुनील केदार यांच्या हुकूमशाही शैलीच्या कारभारामुळेच पक्ष सोडण्याचा निर्णय घेतला, असे स्पष्ट लिहिले आहे त्यामुळे जिल्ह्यातील काँग्रेस नेतृत्वापुढे वाढती नाराजी आणि गळती रोखण्याचे मोठे आव्हान उभे राहिले आहे.
काँग्रेसची आगामी निवडणुकांतील तयारी ढासळू शकते
या सर्व घटनांनंतर सुनील केदार यांच्यावर पक्षाकडून शिस्तभंगाची कारवाई होण्याची शक्यताही व्यक्त केली जात आहे. प्रदेश नेतृत्वाकडे पोहोचलेल्या तक्रारींची संख्या वाढत असून काही वरिष्ठ नेतेही परिस्थिती गंभीर असल्याचे मान्य करत आहेत. नागपूरसारख्या महत्त्वाच्या जिल्ह्यात सतत सुरू असलेल्या राजीनाम्यांमुळे काँग्रेसची आगामी स्थानिक निवडणुकांतील तयारी मोठ्या प्रमाणावर ढासळू शकते, अशी भीती व्यक्त होत आहे.
