शारीरीक छळाला कंटाळून डॉक्टर पत्नीची आत्महत्या : पंकजा मुंडेंच्या पीएला मध्यरात्री बेड्या
Doctor’s wife commits suicide due to physical torture : Pankaja Munde’s PA shackled in the middle of the night वरळी (24 नोव्हेंबर 2025) : डॉक्टर पत्नीने पतीसह सासरच्या त्रासाला कंटाळून आत्महत्या केल्याने मंत्री पंकजा मुंडे यांचे स्वीय सहायक (पीए) अनंत गर्जे यांना मध्यरात्री अटक करण्यात आल्याने सर्वत्र खळबळ उडाली आहे. गर्जे यांच्या पत्नी गौरी पालवे-गर्जे यांनी गळफास घेत आत्महत्या केल्याची घटना घडली होती. सोमवारी आरोपी गर्जेला वरळी पोलिस न्यायालयात हजर करतील.
त्रासाला कंटाळून डॉक्टर पत्नीची आत्महत्या
डॉ.गौरी पालवे गर्जे आत्महत्येप्रकरणी रविवारी भारतीय न्याय संहिता कलम 108, 85, 352 आणि 351(2) अंतर्गत गुन्हा दाखल आहे. अनंत गर्जे, त्यांची बहीण शीतल गर्जे- आंधळे आणि दीर अजय गर्जे यांच्या विरोधात हा गुन्हा दाखल आहे. या तिघांवर त्रास देणे, अपमान करणे आणि आत्महत्येस प्रवृत्त केल्याचा ठपका आहे.
तपासाला सहकार्य करण्यासाठी स्वतःहून हजर
अनंत गर्जे यांच्याकडून एक निवेदन जारी करण्यात आले आहे. यामध्ये म्हटले आहे की, पत्नीच्या दुर्दैवी आणि मन हेलावून टाकणार्‍या घटनेनंतर अनंत गर्जे हे 24 रोजी मध्यरात्री वरळी पोलिस स्थानकात हजर झाले. या संपूर्ण प्रकरणाचा निष्पक्ष तपास व्हावा आणि सत्य जनसमोर यावे, यासाठी ते तपास यंत्रणांना आवश्यक ती सर्व माहिती आणि मदत करायला तयार आहेत, असे या निवेदनात नमूद आहे.
दमानियांची पोलिसांवर टीका
सामाजिक कार्यकर्त्या अंजली दमानिया यांनी मुंबई पोलिसांच्या कार्यपद्धतीवर गंभीर शंका उपस्थित केल्या. गौरी पालवे यांच्या मृत्यूनंतर तिच्या आईवडिलांना वेदना सहन कराव्या लागत आहेत. गौरीने गळफास लावून घेतल्यानंतर अनंत गर्जे यांनी तिचा मृतदेह नायर रुग्णालयात आणला. त्यावेळीच पोलिसांनी अनंत गर्जे यांना अटक का केली नाही? त्यावेळी त्यांना सोडून का देण्यात आले, असा सवाल दमानियांनी केला.
