भुसावळ पालिका निवडणुकीत आठ जागांवर होणार चुरशीची लढत !

अशा होणार चुरशीच्या लढती

प्रभाग 1 – ब : शहरात भाजप व शिंदे गटात युती झाली. पण, या प्रभागात दोन्ही पक्षांचे उमेदवार रिंगणात आहेत. त्यांच्यातील मैत्रीपूर्ण लढत रंगतदार ठरेल. इतरही अपक्ष असल्याने मत विभाजन कळीचा मुद्दा ठरेल. तसेच या प्रभागात भाजपच्या एका पदाधिकार्‍याने बंडखोरी करुन अपक्ष अर्ज कायम ठेवला आहे.

प्रभाग 4 : शहरातील सर्वात कमी 1500 मतदारसंख्येचा हा प्रभाग आहे. अ आणि ब या दोन्ही जागांवर 8-10 उमेदवार रिंगणात आहेत. यामुळे मत विभाजन होईल. रेल्वेने अतिक्रमण काढल्यानंतर येथील रहिवासी विस्थापित झाले. अनेकांनी नवीन ठिकाणी मतदार यादीत नावे नोंदवली. यामुळे मतदार कमी आहेत.

प्रभाग 8 ब : येथे शिवसेना शिंदे गटाच्या उमेदवाराविरुद्ध भाजपच्या दोन पदाधिकार्‍यांनी बंडखोरी केली आहे. अपक्ष, राष्ट्रवादी शरद पवार गट व बंडखोर उमेदवार यांच्यात अटीतटीचा सामना आहे. या प्रभागात भाजपचे पदाधिकारी मित्र पक्षाच्या उमेदवाराला कितपत मदत करतात? यावर निकाल ठरेल.

प्रभाग 14 : प्रभाग 14 अ मध्ये भाजपा, राष्ट्रवादी अजित पवार गट व काँग्रेस अशी तिरंगी लढत होईल. सोबत 14 ब मध्ये भाजपा राष्ट्रवादी शरद पवार गट व काँग्रेस, अपक्ष उमेदवाराची चौरंगी लढत होईल. मातब्बर विरोधात नवखे अशी लढत येई पहायला मिळेल.

प्रभाग 20 ब : येथे भाजपाविरुद्ध अपक्ष अशी सरळ लढत आहे. एससी, मुस्लिम, लेवा पाटीदार, बारा बलुतेदार मतदार आहेत. निर्णायक असलेले दलित-मुस्लिम मते खेचण्यासाठी उमेदवारांचा आटापिटा सुरू आहे. मत विभाजनावर निकालाचे चित्र अवलंबून राहील. कमी मताने उमेदवार जिंकेल.

प्रभाग 23 ब : भाजप-शिंदे गटाची युती असली तरी येथे दोघांमध्ये मैत्रीपूर्ण लढत होत आहे. मातब्बर व तरुण असे लढतीचे स्वरूप आहे. या प्रभागात निवडून येणार्‍या उमेदवाराचे मताधिक्य 50 ते 100 च्या आत असेल असा राजकीय जाणकारांचा अंदाज आहे.