लाडकी बहिण योजना बंद होवू देणार नाही ; भुसावळात एक तरी उद्योग आणणार ! मुख्यमंत्री देवेंद्र फडणवीस
भुसावळ (24 नोव्हेंबर 2025) : भुसावळातील एमआयडीसीत टेक्सटाईल पार्क आणण्याची मागणी मंत्री संजय सावकारे यांनी केल्यानंतर मुख्यमंत्र्यांनी त्यांना भाषणातून आश्वस्त करीत पुढील महिन्यात डावोसमध्ये जात असल्याने एक तरी उद्योग भुसावळसाठी आणणार असल्याची ग्वाही दिली. जळगाव जिल्ह्यातील भाजपा उमेदवारांच्या प्रचारार्थ पु.ओं.नाहाटा महाविद्यालयासमोरील नियोजित बसस्थानकाच्या जागेवर सोमवारी सायंकाळी पाच वाजता झालेल्या सभेत मुख्यमंत्री बोलत होते.
मंत्री सावकारे यांची प्रत्येक मागणी मान्य
फडणवीस म्हणाले की, दीपनगरात 800 मेगावॅटचा प्रकल्प करायला हवा, अशी मागणी मंत्री सावकारे यांनी केली असून त्यादृष्टीनेही आम्ही प्रयत्न करू शिवाय मंत्री सावकारे यांच्या प्रत्येक मागण्या पूर्णच केल्याचे मुख्यमंत्री म्हणाले.
लाडकी बहिण योजना बंद होणार नाही
सरकारला 23 नोव्हेंबर रोजी येवून एक वर्ष झाले मात्र निवडून आल्यानंतर लाडकी बहिण योजना बंद होईल, अशी भीती घालण्यात आली मात्र जो पर्यंत लाडक्या बहिणींचा हा देवाभाऊ आहे तो पर्यंत योजना बंद होणार नाही, अशी ग्वाही मुख्यमंत्र्यांनी दिली. भुसावळात 147 कोटीतून स्टेशन निर्मिती करण्यात येत असून हे सरकार गरीबांसाठी, महिलांसाठी काम करणारे सरकार असल्याचे ते म्हणाले.तुम्ही भाजपाला साथ द्या, पाच वर्ष आम्ही जवाबदारी घेवू, असेही त्यांनी सांगत महात्मा फुले जनआरोग्य योजनेची व्याप्ती वाढवण्यात आल्याचे सांगितले.
