भुसावळच्या आठवडे बाजार परिसरात रस्त्यांवर अतिक्रमण

विद्यार्थ्यांच्या सुरक्षिततेचा प्रश्न ऐरणीवर
शाळा क्रमांक पाच जवळील परिसरात रस्त्यावर माल मांडला जात असल्याने विद्यार्थ्यांच्या सुरक्षिततेचा प्रश्नही निर्माण झाला आहे. गर्दीच्या वेळी वाहनांची वर्दळ आणि रस्त्यावरील अडथळे यामुळे अपघात होण्याची शक्यता नाकारता येत नाही. परिसरातील रहिवासी आणि व्यापार्‍यांनाही या परिस्थितीचा त्रास सहन करावा लागत असल्याचे नागरिकांचे म्हणणे आहे.

पोलीस प्रशासन आणि नगरपरिषदेकडे कारवाईची मागणी
सार्वजनिक रस्ते हे सर्व नागरिकांच्या वापरासाठी असताना त्यांचा व्यावसायीक कारणांसाठी अडथळा निर्माण होईल अशा पद्धतीने वापर केला जाणे योग्य नसल्याची भावना नागरिकांकडून व्यक्त होत आहे. त्यामुळे भुसावळ नगर परिषद आणि पोलीस प्रशासनाने संयुक्तपणे संबंधित परिसराची पाहणी करून अतिक्रमणाची खातरजमा करावी आणि नियमानुसार कठोर कारवाई करावी, अशी मागणी करण्यात येत आहे.

केवळ एक-दोन दिवसांपुरती कारवाई न करता रस्त्यावरील अतिक्रमण कायमस्वरूपी हटवावे तसेच पुन्हा अतिक्रमण होऊ नये यासाठी नियमित देखरेख आणि आवश्यक ती उपाययोजना करावी, अशी अपेक्षा नागरिकांनी व्यक्त केली आहे.

वाहतूक शाखेकडून धडक कारवाई होणार : सहा.निरीक्षक राहुल भंडारे
सणा-सुदीचा काळ असून व्यापार्‍यांनी रस्त्यांवर आपले साहित्य आणू नये व वाहतूक कोंडी निर्माण करू नये. वाहतूक शाखेकडून बाजारपेठेत नियमित गस्त वाढवण्यात आली असून रस्त्यांवर अडथळा वा वाहतूक खोळंबल्यास संबंधितावर पोलीस प्रशासनाकडून कारवाई करण्यात येईल, असे सहा.निरीक्षक राहुल भंडारे यांनी सांगितले.