राज्यभरात डिलिव्हरी बॉयला लुटणारे आरोपी जाळ्यात

मोबाईल क्रमांकावरून लागला ट्रेस 
पोलिस सूत्रांनी दिलेल्या माहितीनुसार चेतन राजेंद्र सपकार (26 धंदा- खाजगी नोकरी, रा. शिंदगव्हाण, ता.जि. नंदुरबार) यांची डिलीवरी डॉट कॉम नावाची कुरीयर सर्व्हिस आहे. त्यांच्याकडे ि7 ऑक्टोबर 2020 रोजी मनिषा (छोरीया रेसिडन्सी, नंदुरबार) नावाच्या ग्राहकाने विवो मोबाईल एक्सप्रेस या साईडवरुन 49,980/- रु किंमतीची एक वस्तु कॅश ऑन डिलेव्हरी मागविली. वस्तु डिलेव्हरी करण्यासाठी चेतन राजेंद्र सपकार यांनी 7887386880 या क्रमांकवर फोन केला असता त्याने बाहेर असल्याचे सांगत नंदुरबार शहरातील खंडेलवाल टाऊन येथे मातोश्री बंगल्या समोर बोलाविले. चेतन सपकार हा पार्सल देण्यासाठी गेला असता तेथे थांबलेल्या दोन जणांनी पैसे न देताच वस्तु हिसकावली व मागुन आलेल्या मोटारसायकलवर बसून तिन्ही जण पळून गेले. याविषयी उपनगर पोलीस ठाण्यात गुन्हा दाखल होताच पोलीस अधीक्षक महेंद्र पंडीत यांनी तपासासाठी स्थानिक गुन्हे अन्वेषण शाखेचे पथक तयार केले. महागडे पार्सल बुक करुन कॅश ऑन डिलीवरी करतांना डिलीवरी बॉयला लुटणे अशा पध्दतीचा गुन्हा नवीनच होता. म्हणून प्रथम फिर्यादी चेतन सपकारच्या मोबाईलवर बुकींगसाठी आलेल्या नंबरचे तांत्रिक विश्लेषण करण्यात आले.

वेषांतर करीत पथकाने शोधले आरोपी
स्थानिक गुन्हे अन्वेषण शाखेचे एक पथक नांदगांव, मनमाड, जि. नाशिक चाळीसगांव जि. जळगांव येथे रवाना केले. पथकाने वेषांतर करुन 2 दिवस तपास केल्यावर संशयीत आरोपी हे नांदगांव शहरात तीन वेगवेगळ्या कंपनीचे पार्सल बुक करुन कुरीयर सर्व्हिसच्या डिलीवरी बॉयला लुटण्याच्या प्रयत्नात आहे असे समजल्याने स्थानिक गुन्हे अन्वेषण शाखेच्या पथकने स्टेट बँक ऑफ इंडीया शाखा, नांदगांव परीसरात सापळा रचला. पथकातीलच एका कर्मचार्‍याला डमी डिलीवरी बॉय बनवून पार्सल देण्यासाठी पाठविले. डमी डिलीवरी बॉयच्या हालचाली संशयास्पद वाटल्याने संशयीत आरोपींनी पळून जाण्याचा प्रयत्न केला. परंतु फिल्मीस्टाईल झटापटी करुन तिन्ही आरोपीतांना ताब्यात घेण्यात आले. ताब्यात घेतल्यानंतर धक्कादायक अशी माहिती समोर आली की, लॉकडाऊन काळात कामधंदा नसल्याने चोरी करण्याचे ठरविले व चोरी कशी करावी याबाबत त्यांनी युट्युबवर संपूर्ण माहिती घेतली. त्यानुसार त्यांनी पहिला प्रकार मुंबई येथे केला. त्यात ते तिन्ही यशस्वी झाले. त्यानंतर बदलापुर, जि.ठाणे, बीड, कोपरगाव, जि.अहमदनगर, भुसावळ, चाळीसगाव येथे गुन्हे केल्याची माहिती दिली. संशयीत आरोपीतांना अधिक विचारपुस केली असता त्यांनी सांगितले की, ऑनलाईन गुगल मॅपद्वारे एखादे शहर निवडुन तेथील श्रीमंत वस्तीमधील कोणत्याही एका श्रीमंत व्यक्तीच्या नावाने महागड्या वस्तु ऑनलाईन बुक करायच्या पार्सल घेतांना बोलण्यात गुंग करुन आलेले पार्सल इतर दोन आरोपीतांकडे द्यायचे. डिलीवरी बॉय पैसे मोजत असतांना पार्सलचे सील अतिशय हुशारीने कापुन त्यातील महागडे पार्सल काढुन घेवुन त्यात साबन, दगड किंवा इतर वस्तु ठेवुन व्यवस्थित पूर्ववत बंद करून द्यायचे. मग पैसे नसल्याचे सांगून डिलीवरी बॉयला ऑनलाईन आलेले पार्सल परत करुन देत असत. एखाद्या वेळेस डिलीवरी बॉयला संशय आल्यास त्याच्याशी झटापटी करुन तेथुन पळुन जाणे अशा प्रकारची नवीन पध्द्धत त्यांनी अवलंबली होती.

यु ट्यूबवरून आरोपी शिकले चोरीची पद्धत
तिन्ही आरोपीतांकडे स्वत:चे प्रत्येकी 5 ते 7 बनावट आधारकार्ड मिळून आलेले आहेत. त्याद्वारे ते प्रत्येक वेळी ऑनलाईन पार्सल बुक करतांना एक नवीन सिमकार्ड खरेदी करुन त्या मोबाईल नंबरचा वापर ऑनलाईन पार्सल बुक करतांना करत होते. एखादी घटना केल्यानंतर आरोपी लागलीच सीमकार्ड तोडुन फेकुन देत असे. त्यामुळे अद्याप पावेतो त्यांच्यापर्यंत पोलिस पोहचू शकत नव्हते. परंतु नंदुरबार जिल्हा पोलीस दलाने अतिशय बारकाईने नविन पध्द्तीच्या या गुन्ह्याचा अभ्यास करुन आरोपीतांना ताब्यात घेतले आहे. तिन्ही आरोपीतांचे शिक्षण 10 वी पर्यंतच झाले आहे. सर्व पध्द्त त्यांनी ऑनलाईन यु ट्युबद्वारे शिकल्याचे सांगितले.

तीन लाख 68 हजारांचा मुद्देमाल जप्त
आरोपींकडुन नंदुरबार येथील गुन्ह्यात लुटण्यात आलेला 30,999/- रु किंमतीचा मोबाईल व गुन्ह्यात वापरलेली 50 हजार रुपये किमंती एक दुचाकी मोटार सायकल हस्तगत करण्यात आलेली असून नांदगांव जि. नाशिक येथे गुन्हा करण्यासाठी आणलेली 2 लाख 50 हजार रुपये किमतीची चारचाकी सँट्रो कार , 21 हजार रुपये किमतीचे 3 मोबाईल, 16 हजार रुपये रोख अ‍ॅमेझॉन प्राईम कंपणीचे चिकट टेप, अ‍ॅमेझॉन प्राईम लिहीलेले 5 बॉक्स, रिन कंपणीचे साबण असा एकुण तीन लाख 68 हजार 99 रुपयांचा मुद्देमाल हस्तगत करण्यात आलेला आहे.

यांनी आवळल्या आरोपींच्या मुसक्या
ही कामगिरी पोलीस अधिक्षक महेंद्र पंडित, अपर पोलीस अधीक्षक विजय पवार यांच्या मार्गदर्शनाखाली स्थानिक गुन्हे अन्वेषण शाखेचे वरिष्ठ पोलिस निरीक्षक किशोर नवले, पोलिस उपनिरीक्षक योगेश राऊत, पोलिस हवालदार प्रमोद सोनवणे, पोलीस नाईक राकेश मोरे, पोलीस शिपाई विजय ढिवरे, अभय राजपुत, आनंदा मराठे यांच्या पथकाने केली.