शिवसेना पदाधिकार्‍यांकडून पिस्टल व तलवार रोखून हल्ला : अ‍ॅड.रोहिणी खडसे

मुक्ताईनगर : हळद समारंभावरून मुक्ताईनगरकडे निघालेल्या माजी मंत्री एकनाथराव खडसे यांच्या कन्या तथा जिल्हा बँकेच्या माजी अध्यक्षा तथा विद्यमान संचालक अ‍ॅड.रोहिणी खडसे (Add.Rohini Khadse) यांच्या वाहनावर सहा हल्लेखोरांनी हल्ला केल्याची संतापजनक घटना सोमवारी रात्री साडेआठ ते नऊ वाजेच्या सुमारास मुक्ताईनगर शहराजवळील मानेगाव फाट्याजवळ घडली होती. या घटनेनंतर मुक्ताईनगरातील राजकीय वातावरण ढवळून निघाले होते. दरम्यान, अ‍ॅड.रोहिणी खडसे यांनी मुक्ताईनगर पोलिसात या प्रकरणी फिर्याद दिली असून शिवसेना पदाधिकार्‍यांनी पिस्टल (Pistal) व तलवार रोखून आपल्यावर हल्ला केल्याचे त्यात म्हटले आहे. या तक्रारीनुसार पोलिसांनी शिवसेना तालुकाप्रमुख छोटू भोई, विधानसभा क्षेत्रप्रमुख सुनील काशीनाथ पाटील व चांगदेव ग्रामपंचायत सदस्य पंकज कोळी यांच्याविरोधात गुन्हा दाखल करण्यात आल्याने राजकीय वर्तुळात मोठी खळबळ उडाली आहे. दरम्यान, दोषींवर कारवाईच्या मागणीसाठी मुक्ताईनगर तहसीलबाहेर ठिय्या आंदोलन छेडण्यात आले आहे.

• हा तर भ्याड हल्ला ; उच्चस्तरीय चौकशीची मागणी करणार : आमदार चंद्रकांत पाटील

हल्ल्याला बोदवडमधील वादाची किनार
अ‍ॅड.रोहिणी खडसे (Add.Rohini Khadse) यांनी मुक्ताईनगर पोलिसात दिलेल्या फिर्यादीनुसार, बोदवड नगरपंचायतीच्या निवडणुकीत पूर्व प्रचारादरम्यान राष्ट्रवादी जिल्हाध्यक्ष रवींद्र भैय्या पाटील व आपणास मुक्ताईनगरातील छोटू भोई, अफसर खान, वरणगावचे समाधान महाजन यांनी आपल्याला धक्काबुकी व दमबाजी केली होती. त्यानंतर 24 डिसेंबर रोजी आमच्या कार्यकर्त्यांच्या घरी जावून महिलेचा विनयभंग करण्यात आला. या प्रकरणी आम्ही गृहमंत्री व पोलिस अधीक्षकांना छोटू भोई यांचे अवैध धंदे बंद करण्यासंदर्भात निवेदन दिले होते व त्यामुळेच त्यांचा माझ्याविषयी प्रचंड राग होता.