नाशिक विभागातील सर्वात मोठी कारवाई : भुसावळात तीन कंटेनरमधून दोन कोटी 27 लाखांचा गुटखा जप्त
भुसावळ : राजस्थानातून जळगावकडे जाणारा तीन कंटेनर गुटख्याचा साठा डीवायएसपी सोमनाथ वाघचौरे यांनी पथकासोबत पकडल्याने गुटखा तस्करांच्या गोटात प्रचंड खळबळ उडाली आहे. पोलिसांनी दोन कोटी 27 लाख रुपयांचा गुटखा तसेच एक कोटी 23 लाख रुपये किमतीचे तीन कंटेनर असा एकूण साडेतीन कोटींचा मुद्देमाल जप्त केला आहे. या प्रकरणी एकास अटक केली असून अन्य कंटेनरचालक पसार झाले आहेत.
गोपनीय माहितीवरून सापळा रचून कारवाई
शुक्रवारी डीवायएसपी सोमनाथ वाघचौरे यांना गुटख्याबाबत गुप्त माहिती मिळाली होती. त्यामुळे वाघचौरे यांनी स्वत: भुसावळ-साकेगाव दरम्यान पाहणी केली. यावेळी साकेगावजवळील पेट्रोल पंपावर तीन कंटेनर उभे असलेले दिसले. यावेळी पोलिस ताफा कंटेनरकडे वळताच कंटेनरचालक पसार झाले मात्र एका संशयीताला पकडण्यात पोलिसांना यश आले. तिन्ही कंटेनर डीवायएसपी कार्यालयाच्या आवारात पंचनामा करून जमा केले आहेत. या गुटखा नेमका कुणाचा याचा शोध सुरु आहे.
मोबाइलवर मिळत होत्या सूचना
या प्रकरणातील तिन्ही कंटेनरचालकांना ऐनवेळी मोबाईलवर सूचना मिळत होत्या. त्यामुळे कंटेनर कुठे जाणार होते. याची माहिती निष्पन्न झालेली नाही. पोलिसांच्या ताब्यातील संशयीयतालाही त्याबाबत माहिती नाही. सूचना मिळाल्यानुसार कंटेनर मार्गस्थ केले जात होते, अशी माहिती समोर आली आहे.
आजवरची सर्वात मोठी कारवाई
भुसावळात पकडलेल्या गुटख्याची नाशिक परीक्षेत्रातील सर्वात मोठी कारवाई आहे. नशामुक्त अभियानाचेच हे एक पाऊल आहे. आतापर्यत नाशिक रेंजमध्ये 27 कोटी रुपयांचा गुटखा पकडलेला आहे. पोलिस कर्मचार्‍यांनी दाखवलेली सतर्कता कौतुकास्पद असल्याचे नाशिक विभागाचे विशेष महानिरीक्षक डॉ. बी.जी.शेखर पाटील म्हणाले.
भुसावळात गावठी कट्टा व सहा जिवंत काडतुसांसह आरोपी जाळ्यात
