‘अंतर्नाद’तर्फे गणेशोत्सवात एक दुर्वा समर्पणाची उपक्रम

भुसावळ : भुसावळच्या अंतर्नाद प्रतिष्ठानतर्फे गणेशोत्सवाचे औचित्य साधून ‘एक दुर्वा समर्पणाची’ उपक्रम गणेशोत्सव काळात राबवण्यात येणार आहे. गणेशोत्सवाच्या खर्चात बचत करून वंचित, गरजू आणि गरजवंत विद्यार्थ्यांना शैक्षणिक साहित्य वाटप करायचे, असा हा उपक्रम आहे. यंदा उपक्रमाचे सहावे वर्ष आहे.

असे आहे उपक्रमाचे वैशिष्ट्य
गणेशोत्सवात वारेमाप होणार्‍या खर्चात बचत करण्याचे आवाहन प्रतिष्ठानतर्फे दरवर्षी केले जाते. गणरायाला दुर्वा म्हणून शैक्षणिक साहित्य अर्पण करून ते गोरगरीब विद्यार्थ्यांना वाटप करायचे, असा हा साधा आणि सोपा उपक्रम आहे. यंदा या उपक्रमाचे सहावे वर्ष आहे. गेल्या पाच वर्षांत तब्बल 21 शाळांमध्ये किमान 1780 गरजू विद्यार्थ्यांना या उपक्रमाचा लाभ झाला आहे. भुसावळ, बोदवड, यावल आणि रावेर तालुक्यातील शाळा निवडून हे साहित्य वाटप करण्यात आले. यंदाही ग्रामीण व शहरी भागातील पाच शाळांची निवड करून त्या ठिकाणी हा उपक्रम राबवण्यात येणार आहे. त्यात पाटी, पेन्सील, वह्या, पेन, कंपासपेटी, गणवेश, पुस्तक या साहित्याचा समावेश असेल. अंतर्नाद प्रतिष्ठानचे अध्यक्ष संदीप पाटील यांनी या उपक्रमाची मुहूर्तमेढ रोवली आहे. ज्या दात्यांना शक्य असेल त्यांनी उपक्रमात सहभागी होऊन शालेय साहित्य मदत म्हणून संस्थेस देण्याचे आवाहन प्रकल्प प्रमुख समाधान जाधव, प्रकल्प समन्वयक ज्ञानेश्वर घुले आणि सह समन्वयक देव सरकटे यांनी केले आहे.