भुसावळात कर्तव्याशी प्रामाणिक राहून सेवा देणार्‍या खाकीतील शिलेदारांचा सन्मान

भुसावळ  :खाकीतील कर्तव्याशी प्रामाणिक राहून दिलेल्या वेळेत आपले काम जवाबदारीने पूर्ण करणार्‍या पाच शिलेदारांचा पोलीस उपअधीक्षक कृष्णात पिंगळे यांनी मंगळवारी सहृदय सन्मान केला. ‘नूतन उपअधीक्षक पोलीस स्टेशन एम्प्लाई ऑफ द मंथ’ ही संकल्पना राबवण्यास सुरूवात केली आहे. त्यानुसार दर महिन्याला उत्कृष्ट काम करणार्‍या कर्मचार्‍यांचा सन्मान करण्यात येणार आहे. पोलीस अधीक्षकांकडून या कर्मचार्‍यांना प्रत्येक एक हजार रुपये रीवॉर्डही दिला जाणार असून मानकर्‍यांचा एकत्रीत फोटो डीवायएसपी कार्यालयाच्या दर्शनी भागावर लावण्यात येणार आहे. कर्मचार्‍यांमध्ये कामाप्रती आता अधिक हुरूप वाढला आहे.

पोलीस उपअधीक्षकांकडून कर्मचार्‍यांचे कौतुक
मंगळवारी झालेल्या आढावा बैठकीत पोलीस उपअधीक्षक पिंगळे यांनी पाचही कर्मचार्‍यांचे कौतुक करीत त्यांच्या पाठीवर शाबासकीची थाप मारल्याने कर्मचार्‍यांचा कामाप्रतीचा उत्साह दुणावला असून अन्य कर्मचारीदेखील या कामाची प्रेरणा घेवून आता शासकीय काम जलदगतीने करतील, अशी आशा नूतन उपअधीक्षक पिंगळे यांनी व्यक्त केली.