तामथरे मंडळाधिकारी, कोतवालासह तिघे नंदुरबार एसीबीच्या जाळ्यात
30 हजारांची लाच मागणी भोवली : नंदुरबार एसीबीच्या कारवाईने खळबळ
Tamthare Mandaldhikari, Kotwal along with three Nandurbar in ACB’s net नंदुरबार : सातबारा उतारा व खातेफोड करून देण्याच्या मोबदल्यात 30 हजारांची तजडजोडीअंती लाच मागणार्या तामथरे, ता.शिंदखेडा मंडळाच्या महिला मंडळाधिकार्यासह कोतवाल व संगणक ऑपरेटर यांना बुधवारी सायंकाळी नंदुरबार एसीबीच्या पथकाने अटक केल्याने लाचखोरांमध्ये खळबळ उडाली आहे. अटकेतील संशयितांमध्ये तत्कालीन रोजगाव सजाच्या तलाठी व हल्ली तामथरे मंडळाधिकारी ज्योती के.पवार (35, रा.निजामपूर, ता.साक्री), रोजगाव सजाचे संगणक ऑपरेटर योगेश कैलास सावडे (25, रा.उमर्डी, ता.साक्री) व जैताणे कोतवाल छोटू भिकारी जाधव (45, जैताणे, ता.साक्री) अशी अटकेतील आरोपींची नावे आहेत.
असे आहे लाच प्रकरण
जैताणे, ता.साक्री येथील 45 वर्षीय तक्रारदाराच्या तक्रारीनुसार, त्यांच्या वडिलांच्या व भावाच्या नावाने रोजगाव, ता.साक्री येथील शिवारात सर्वे क्र.155/62 व 155/63 या शेतीचे खातेफोड करून तीन्ही भावांच्या नावाने सातबारा तयार करून देण्याचे मोबदल्यात 40 हजारांची लाच त्यावेळी रोजगाव तलाठी असलेल्या ज्योती के.पवार यांनी मागितली होती व तक्रारदाराकडून मार्च 2023 मध्ये दहा हजारांची लाच तसेच त्यांच्या वडिलांकडून दहा हजारांची लाच यापूर्वीच स्वीकारली होती. त्यानंतर 18 एप्रिल 2023 रोजी तक्रारदार यांनी नंदुरबार एसीबीकडे तक्रार नोंदवल्यानंतर 18 व 29 मे रोजी पडताळणी करण्यात आली. तत्कालीन तलाठी व हल्ली मंडळाधिकारी असलेल्या ज्योती पवार यांना लाच देण्यासाठी तक्रारदार गेल्यानंतर त्या आढळल्या नाहीत मात्र कार्यालयातील संगणक ऑपरेटर योगेश सावळे यांनी तक्रारदार यांना पैसे आणलेत का? विचारून लाचेची मागणी केली तसेच 29 मे 2023 रोजी सापळा कार्यवाही दरम्यान यातील आरोपी योगेश सावळे व आरोपी कोतवाल छोटू जाधव यांनी आरोपी ज्योती पवार यांनी सांगितल्यावरून जैताणे येथील तक्रारदाराकडे घरी जावून लाचेची रक्कम घेण्याकरीता जात पुन्हा पंच साक्षीरांसमक्ष लाचेची मागणी केली. लाच मागणीचा अहवाल आल्यानंतर बुधवारी सायंकाळी निजामपूर पोलिसात तिन्ही लाचखोरांविरोधात गुन्हा दाखल करण्यात आला.
