व्हीएसआरची विमाने म्हणजे उडते ‘डेथ ट्रॅप’ : आमदार रोहित पवारांचा खळबळजनक दावा

काय म्हणाले रोहित पवार?
रोहित पवार आपल्या पोस्टमध्ये म्हणतात की, अजितदादांच्या विमान अपघाताला कारणीभूत असलेल्या व्हीएसआर कंपनीची बहुतांश विमाने सदोष असून उड्डाणासाठी अत्यंत धोकादायक असल्याने आता कंपनीचे पायलट आणि क्रू मेंबर यांनादेखील अपघाताची भीती वाटतेय. दोन-तीन दिवसांपूर्वी झालेल्या कंपनीच्या बैठकीत पायलट आणि इतर कर्मचार्‍यांनी सदोष विमानात बसण्याची भीती बोलून दाखवली, परंतु सरकारमधील काही लोकांचा वरदहस्त असल्याने ‘सरकार आपल्या पाठीशी आहे, घाबरू नका’ असा शाब्दिक धीर त्यांना देण्यात आला. पण दुर्दैवाने अपघात झाला तर व्यवस्थापनाने त्यांना दिलेल्या या शाब्दिक धीराने त्यांचा जीव वाचणार आहे का, असा प्रश्न पडतो.

व्ही. के. सिंग सरकारपेक्षाही वरचढ झाला का?
एकीकडे अजितदादांच्या अपघातानंतर महाराष्ट्र सरकारने व्हीएसआर कंपनीची 80 कोटींची बिलं अदा केली, दुसरीकडे नियम आणि कायद्यांना पायदळी तुडवूनही व्हीएसआर कंपनीवर अद्यापही कोणतीच कारवाई करण्यात आलेली नाही. या कंपनीचा मालक व्ही. के. सिंग याला कुणाचीही भीती राहिली नसून दिवसेंदिवस त्याची गुर्मी वाढतच चालल्याचं दिसतंय..! तो सरकारपेक्षाही वरचढ झाला का? ज्यामुळं सरकार त्यावर कारवाई करायला घाबरतंय! अशी टीका रोहित पवार यांनी केली आहे.