जळगावात प्रवाशाची रक्कम लांबवली : भामट्याला जिल्हापेठ पोलिसांकडून अटक

जळगाव (गुरुवार, 24 सप्टेंबर 2026) : जळगावातील नवीन बसस्थानक परिसरात दिवसाढवळ्या प्रवाशाच्या हाताला झटका मारून रक्कम बळजबरीने हिसकावून पळून गेलेल्या सराईत भामट्याला अटक करण्यात जिल्हापेठ पोलिसांच्या विशेष पथकाला यश आले आहे. पोलिसांनी आरोपीच्या ताब्यातून 16 हजार रुपयांची रोख रक्कम हस्तगत केली. आरोपीविरोधात विविध पोलीस ठाण्यांमध्ये 6 गंभीर गुन्हे दाखल असल्याचे तपासात समोर आले आहे. भिकन पंडीत शर्मा (60, रा.तलाव गल्ली, पारोळा) असे अटकेतील आरोपीचे नाव आहे

काय आहे प्रकरण ?
नवीन बसस्थानक परिसरात 17 सप्टेंबर 2026 रोजी सकाळी पावणेबारा वाजेच्या सुमारास एक प्रवासी उभा असताना अज्ञात चोरट्याने त्याच्या हातातील 21 हजार रुपयांची रोख रक्कम बळजबरीने हिसकावून पळ काढला होता. या प्रकरणी पीडित प्रवाशाने 19 सप्टेंबर रोजी जिल्हापेठ पोलीस ठाण्यात दिलेल्या तक्रारीवरून गुन्हा दाखल करण्यात आला होता. जिल्हापेठ पोलिसांनी भजी गल्लीत सापळा रचून संशयित भिकन पंडीत शर्मा (60, रा. तलाव गल्ली, पारोळा) याला ताब्यात घेतले. सुरुवातीला त्याने पोलिसांची दिशाभूल करण्याचा प्रयत्न केला मात्र पोलिसी खाक्या दाखवताच त्याने जबरी चोरीची कबुली दिली. आरोपीच्या ताब्यातून चोरी गेलेल्या रकमेपैकी 16 हजार रुपये जप्त करण्यात आले.