पिंपरी : किरकोळ कारणावरून डोक्यात दगड मारून एकाचा खून करण्यात आला तर दुसर्‍याला मारहाण करून जखमी करण्यात आले. जाधववाडी, चिखली येथे गुरुवारी रात्री दीडच्या सुमारास ही घटना घडली. घटनेनंतर पसार झालेल्या दोन आरोपींना पोलिसांनी शिताफीने अटक केली. गुन्हे शाखा युनिट एक तसेच चिखली पोलिसांनी ही कारवाई केली.
या संशयीतांना पडल्या बेड्या
पंडित किसन गायकवाड (वय 56), असे खून झालेल्याचे नाव आहे. सुरेश अंबिका पटेल (वय 27, रा. जाधववाडी), असे जखमी झालेल्याचे नाव आहे. सुरेश नवनाथ राऊत (वय 22), दीपक प्रदीप पाचपिंडे (वय 22, दोघेही रा. जाधववाडी), असे अटक केलेल्यांची नावे आहेत. मयत पंडित गायकवाड यांचा मुलगा नवनाथ पंडित गायकवाड (वय 29, रा. जाधववाडी) यांनी याप्रकरणी चिखली पोलीस ठाण्यात फिर्याद दिली.
टेम्पो लावण्याच्या कारणावरून वाद
पोलिसांनी दिलेल्या माहितीनुसार, मयत पंडित गायकवाड आणि सुरेश पटेल यांची ओळख होती. सुरेश पटेल यांनी त्यांच्याकडे असलेला टेम्पो बुधवारी रात्री जाधववाडी येथील तळई गार्डन समोरील रस्त्यावर पार्क केला होता. पंडित गायकवाड आणि सुरेश पटेल हे दोघेही बुधवारी रात्री नऊच्या सुमारास त्या टेम्पोमध्ये झोपण्यासाठी गेले. रात्री दीडच्या सुमारास आरोपी तेथे गेले. टेम्पो लावण्याच्या कारणावरून आरोपींनी पंडित गायकवाड व सुरेश पटेल यांच्या सोबत भांडण काढून शिवीगाळ केली. लाकडी दांडक्याने मारहाण करून पटेल यांना जखमी केले. पंडित गायकवाड यांना डोक्यात व तोंडावर दगडाने मारून ठार केले. त्यानंतर आरोपी पळून गेले. याप्रकरणी तपास चक्रे फिरवून तांत्रिक विश्लेषण करून पोलिसांनी आरोपींना अटक केली.
