मुक्ताईने माऊलीसह तिघाही बंधूंना बांधली राखी

मुक्ताईनगर : हिन्दू धर्म संस्कृती अनेकविध रूढी-परंपरा व्रतवैकल्य यांनी नटलेली आहे. बहिण-भावांच नातं घट्ट विणणारा प्रेमाचा धागा असलेला सण रक्षाबंधन सण मोठ्या उत्साहात परंपरेनुसार साजरा होतो. संत परंपरेतील संत मुक्ताबाई आपल्या संत भावास निवृत्तीनाथ, ज्ञानेश्वर, सोपानदेव यांना बालपणात बांधणारी राखीची अतुट प्रेमाचे बंधनाची परंपरा संत मुक्ताबाई संस्थान मुक्ताईनगरने आजही सांभाळली आहे.

विधीवत पूजनानंतर बांधली राखी
रक्षाबंधनानिमित्त संत मुक्ताबाई संस्थान मुक्ताईनगर अध्यक्ष रविंद्र पाटील यांनी प्रतिनिधी पाठवून त्र्यंबकेश्वर, आळंदी, सासवड, आपेगाव या समाधीस्थळावर जावून तिघाही बंधूना राखी बांधण्यात आली. रक्षाबंधन पर्वावर संत ज्ञानेश्वर महाराज संस्थान, आळंदी ₹येथे मुक्ताई संस्थानचे विश्वस्त संदिप पाटील व अंकिता पाटील यांनी मुक्ताईची राखी विधीवत पूजनाने माऊलींना बांधली. यावेळी विशाल महाराज खोले , सागर महाराज लाहूडकार, दीपक महाराज, आळंदी देवस्थान कमिटी व्यवस्थापक ज्ञानेश्वर विर व भाविक उपस्थित होते.