आमदार खडसेंच्या जावयाला सात दिवसांची पोलीस कोठडी : वकील म्हणाले हे तर ‘राजकीय षडयंत्र’
MLA Khadse’s son-in-law sent to seven-day police custody पुणे (27 जुलै 2025) : हाय प्रोफाईल रेव्ह पार्टीवर पोलिसांनी छापा टाकत अंमली पदार्थ, दारू आणि हुक्के जप्त केले होते. यावेळी अटक करण्यात आलेल्यांमध्ये दोन महिला, पाच पुरुषांचा समावेश होता तर यावेळी आमदार एकनाथ खडसेंचे जावई प्रांजल खेवलकरही उपस्थित असल्याचे समोर आल्यानंतर राजकीय वर्तुळात खळबळ उडाली होती. दुसर्या दिवशी रविवार, 27 रोजी झालेल्या सुनावणीत न्यायालयाने प्रांजल खेवलकरांसह सातही संशयीतांना सात दिवसांची पोलिस कोठडी सुनावण्यात आली.
दरम्यान, प्रांजल खेवलकर यांच्या वकिलांनी थेट पोलिसांवरच आरोप करीत हे अंमली पदार्थ त्यांनीच प्लांट केले असतील, असे सांगितले.
सर्व आरोपींना न्यायालयात हजर करण्यात आले असता तपास अधिकारी वेळेत न पोहोचल्याने न्यायाधीश चेंबरमध्ये निघून गेले. सुनावणी उशीरा सुरु करण्यात आली. दोन्ही पक्षांच्या युक्तिवादानंतर न्यायालयाने सातही आरोपींना 7 दिवसांची पोलिस कोठडी सुनावली.
यांच्यावर झाली कारवाई
प्रांजल मनिष खेवलकर (41), निखील जेठानंद पोपटाणी (35), समीर फकीर महमंद सय्यद (41), सचिन सोनाजी भोंबे (42), श्रीपाद मोहन यादव (27), ईशा देवज्योत सिंग (22), प्राची गोपाल शर्मा (22) यांचा समावेश आहे. दरम्यान, निखिल पोपटानी, समिर सय्यद आणि एका महिलेला नशा करण्याची सवय असल्याचे सरकारी वकिलांनी नमूद केले. तसेच या प्रकरणाची माहिती देत असताना सरकारी वकिलांनी ’रेव्ह पार्टी’ असा शब्द प्रयोग केला. यावर न्यायाधीशांनी आक्षेप घेत हा शब्द वापरण्यास मनाई केली. अटक केलेल्या आरोपींनी अंमली पदार्थ कुठुन आणले याचा तपास करायचा आहे. त्यासाठी आरोपींना पोलिस कोठडी मिळावी, अशी मागणी सरकारी वकिलांनी न्यायालयात केली.
पोलिसांनीच अंमली पदार्थ प्लांट केले असावेत- प्रांजल खेवलकर यांच्या वकिलांचा युक्तीवाद
एकनाथ खडसे यांचे जावई तसेच राष्ट्रवादी शरद पवार गटाच्या नेत्या रोहिणी खडसे यांचे पती डॉ. प्रांजल खेवलकर यांच्यावर झालेली कारवाई ही राजकीय षड्यंत्र असल्याचे वकिल विजयसिंह ठोंबरे यांनी न्यायालयात सांगितले. आरोपींनी कोणत्याही अंमली पदार्थांचे सेवन केले नव्हते. पोलिसांनीच अंमली पदार्थ प्लांट केले असावेत. आमच्याकडे घटनेचे सीसीटीव्ही फुटेज आहेत. खेवलकर यांनी अंमली पदार्थांचे सेवन केलेले नाही किंवा ते जवळही बाळगले नसल्याचा युक्तीवाद आरोपीच्या वकिलांनी केला.
प्रांजलला या अगोदर तीन वेळी अडकवण्याचा प्रयत्न
पुढे बोलताना वकील विजयसिंह ठोंबरे म्हणाले, प्रांजलला या अगोदर तीन वेळी अडकवण्याचा प्रयत्न झाला. यातील एक ही कलम लागू होत नाही. पोलिस गेले, पोलिसांनी व्हिडीओ शूटिंग केले. यावर कारवाई झाली पाहिजे. कशासाठी कोठडी द्यावी कारण द्यावे. यातील काही जण गुन्हेगार आहे म्हणून कोठडी का द्यावी? सीसीटीव्ही फुटेज आहे आमच्याकडे, मला अडकवायचे होते त्यासाठी एवढे केले का? पोलिसांनी अगोदर पाहणी केली का? या ठिकाणी काही अंमली पदार्थ आढळून आले, पण कुठे दुसरीकडे मिळून आले. राजकीय द्वेषातून हे होत असेल तर चुकीचे आहे. धुळफेक करण्यासाठी गुन्हा दाखल केला आहे. यात काही रोल माझा नाही. माझ्यासमोर सुद्धा कोणी असे काही केले नाही. पोलिसांनी हे सगळे केले असावे, असा माझा आरोप आहे.
