50 हजारांची लाच घेताना पालघर उपजिल्हाधिकारी एसीबीच्या जाळ्यात

शिपायाने दिला लाचेचा निरोप
अधिकार्‍यांनी दिलेल्या माहितीनुसार, फिर्यादी यांना एका जमातीची जमीन खरेदी करायची होती. महाराष्ट्र जमीन महसूल संहितेनुसार बिगर आदिवासींना आदिवासींची जमीन खरेदी करण्यापूर्वी जिल्हाधिकारी कार्यालयाची पूर्वपरवानगी घेणे बंधनकारक आहे. त्यानुसार तक्रारदाराने सप्टेंबर 2022 मध्ये जिल्हाधिकारी कार्यालयाकडे आदिवासींची जमीन हस्तांतरित करण्यासाठी एनओसीसाठी अर्ज दाखल केला होता. 1 ऑगस्ट 2024 रोजी तक्रारदार जिल्हाधिकारी कार्यालयात गेले असता देशमुख नावाच्या शिपायाने काम करण्यासाठी 50 हजार रुपये द्यावे लागतील, असे सांगितले.

कार्यालयात स्वीकारली लाच
त्यानंतर तक्रारदाराला जिल्हाधिकारी कार्यालयात बोलावून उपजिल्हाधिकारी जाधवर यांना भेटण्यास सांगितले. मंगळवार, 13 ऑगस्ट रोजी एसीबीच्या अधिकार्‍यांचे पथक तक्रारदारासह कार्यालयात आले असता या मागणीवर शिक्कामोर्तब झाले. त्याच दिवशी वर्ग एकचे अधिकारी असलेल्या आरोपी जाधवर यांनी तक्रारदाराकडून 50 हजार रुपयांची लाचेची रक्कम स्वीकारली आणि ही रक्कम स्वीकारताना त्याला अटक करण्यात आली. जाधवर याला पोलिस कोठडी मिळाली आहे,’ अशी माहिती एका पोलिस अधिकार्‍याने दिली.